قیدیوں کے تبادلے کے دوسرے مرحلے میں نیتن یاہو کی رکاوٹوں پر صیہونی عہدیداروں کا ردعمل

سچ خبریں:صیہونی اپوزیشن رہنماؤں اور سابق حکام نے قابض وزیر اعظم بنیامین نیتن یاہو کی جانب سے قیدیوں کے تبادلے کے دوسرے مرحلے اور جنگ بندی معاہدے پر عمل درآمد میں تاخیر پر سخت ردعمل کا اظہار کیا ہے۔  

فلسطینی میڈیا سینٹر کی رپورٹ کے مطابق صیہونی قابض وزیر اعظم بنیامین نیتن یاہو کی جانب سے جنگ بندی کے معاہدے پر عمل درآمد میں تاخیر، قیدیوں کے تبادلے کو روکنے اور غزہ کے لیے انسانی امداد معطل کرنے پر صیہونی سیاسی حلقوں میں شدید اختلافات ابھر رہے ہیں۔ اپوزیشن جماعتوں کے رہنماؤں اور سابق عہدیداروں نے نیتن یاہو کو فریب کاری، بدنظمی اور ذاتی سیاسی مفادات کو قومی مفادات پر ترجیح دینے کا الزام دیا ہے۔

یہ بھی پڑھیں:قیدیوں کے تبادلے کے دوسرے مرحلے کے بارے میں صیہونی باشندوں کا اظہار خیال

مرتس پارٹی کی سابق سربراہ زہاوا گالئون نے نتنیاہو پر شدید تنقید کرتے ہوئے کہا کہ نیتن یاہو نے فیصلہ کیا ہے کہ وہ 24 اسرائیلی قیدیوں کی جان قربان کر دے، جو خیال کیا جاتا ہے کہ ابھی تک زندہ ہیں۔

انہوں نے کہا کہ غزہ میں انسانی امداد روکنے کا مطلب یہی ہے، وہ صرف اپنی حکومت بچانے اور اسموٹریچ کے ساتھ اتحاد کو برقرار رکھنے کے لیے جنگ کو ہوا دے رہا ہے۔

سابق صیہونی وزیر اعظم ایہود باراک نے بھی سخت ردعمل کا اظہار کیا اور کہا کہ نیتن یاہو امریکہ کو دھوکہ دے رہا ہے اور یوکرین جنگ سے فائدہ اٹھا رہا ہے، اس کے تمام اقدامات کا مقصد صرف اپنی حکومت کو برقرار رکھنا ہے، اس سے زیادہ کچھ نہیں۔

اسرائیلی اپوزیشن رہنما یائیر لاپید نے بھی حکومت پر عدم منصوبہ بندی اور بدنظمی کا الزام عائد کرتے ہوئے کہا کہ قیدیوں کا تبادلہ رک چکا ہے، غزہ کے لیے امداد معطل ہو چکی ہے،قابض حکومت نے 400000 ریزرو فوجی متحرک کر دیے ہیں لیکن مقصد کیا ہے؟ کیا حکومت نے قیدیوں کو چھوڑ دینے کا فیصلہ کر لیا ہے؟ اگر ایسا ہے تو کیوں؟ کیا کوئی اس سے بڑا مقصد ہے؟

مزید پڑھیں: قیدیوں کے تبادلے کے دوسرے مرحلے کی تازی ترین صورتحال

انہوں نے مزید کہا کہ اگر ہم دوبارہ جنگ شروع کریں گے تو اس کا ہدف کیا ہوگا؟ آخر میں حماس کی جگہ کون لے گا؟ یہ حکومت بغیر کسی حکمت عملی، بغیر کسی ویژن کے آگے بڑھ رہی ہے اور بس امید کر رہی ہے کہ حالات خود ہی سنبھل جائیں گے، ان کی منصوبہ بندی کی یہی آخری حد ہے۔