یمن جنگ بندی پر صیہونی تشویش، ٹرمپ کی نیتن یاہو سے مایوسی

?️ 9 مئی 2025

سچ خبریں:ٹرمپ کے یمن پر حملے روکنے کے اعلان کے بعد اسرائیل نے یمنی حملوں کے ممکنہ خطرات پر تشویش ظاہر کی ہے، جب کہ امریکی ذرائع کے مطابق ٹرمپ نے نیتن یاہو کی کارکردگی سے مایوس ہو کر خطے میں آئندہ اقدامات کو اس کے بغیر طے کرنے کا فیصلہ کیا ہے۔

امریکی صدر ڈونلڈ ٹرمپ کی جانب سے یمن پر امریکی حملے روکنے کے اچانک اعلان نے نہ صرف واشنگٹن بلکہ تل ابیب میں بھی خطرے کی گھنٹیاں بجا دیں۔

یہ بھی پڑھیں:ٹرمپ کے دورہ سعودی عرب پر صیہونی حکومت کی تشویش اور شدید خطرے کا احساس

صہیونی ذرائع کے مطابق، اس فیصلے کے بعد اسرائیل میں اعلیٰ عسکری اور انٹیلیجنس حکام نے مشاورتی اجلاسوں کا سلسلہ شروع کر دیا ہے،اہم خدشہ یہ ہے کہ یمنی انصاراللہ تحریک اب اسرائیل کی تنصیبات جیسے بجلی کے نیٹ ورک کو نشانہ بنا سکتی ہے۔

صہیونی چینل 14 کی رپورٹ کے مطابق، اسرائیلی دفاعی قیادت اس بات کا خدشہ ظاہر کر رہی ہے کہ جب امریکہ پیچھے ہٹ گیا ہے، تو یمنی مزاحمت کار اسرائیلی فوجی و شہری اہداف پر حملے مزید تیز کر سکتے ہیں۔

ذرائع کے مطابق، اسرائیل نے فوری جوابی کارروائی کا انتباہ بھی دیا ہے،اسرائیلی وزیر خارجہ گدعون ساعر نے روزنامہ یدیعوت احرونٹ سے گفتگو کرتے ہوئے کہا کہ ٹرمپ کی جانب سے جنگ بندی کے اعلان سے قبل اسرائیل کو کوئی اطلاع نہیں دی گئی، جو سٹریٹجک رابطے کی کمی کو ظاہر کرتا ہے۔

دوسری جانب، عبرانی روزنامہ یسرائیل ہیوم نے باخبر امریکی ذرائع کے حوالے سے انکشاف کیا ہے کہ ٹرمپ، نیتن یاہو کی پالیسیوں سے شدید مایوس ہو چکے ہیں اور مشرق وسطیٰ میں آئندہ کسی بھی اقدام میں ان پر انحصار نہیں کریں گے۔

مزید پڑھیں:سعودی عرب کب تک امریکہ سے دور رہے گا؟

رپورٹ کے مطابق، ٹرمپ اب خطے میں اپنے فیصلے براہِ راست اور خود مختار انداز میں کریں گے، اور نتانیاہو کو نظرانداز کرنا ان کے نئے علاقائی وژن کا حصہ ہے۔