صیہونیوں کی ایران امریکہ مذاکرات میں مداخلت کی کوشش ناکام؛صیہونی میڈیا کا اعتراف

سچ خبریں:صہیونی میڈیا نے اعتراف کیا ہے کہ موساد اور صیہونی وزیر نے ایران امریکہ مذاکرات میں امریکی نمائندے اسٹیو ویٹکاف کے مؤقف تبدیل کرنے کی بھرپور کوشش کی لیکن انہیں ناکامی ہوئی۔

یہ بھی پڑھیں:ایران-امریکہ مذاکرات کیسے ہونا چاہیے؟ صیہونیوں کی خام خیالی

صہیونی اخبار ہروشلم پوسٹ کی رپورٹ کے مطابق، اسرائیلی خفیہ ایجنسی موساد کے سربراہ ڈیوڈ بارنیا اور وزیر برائے اسٹریٹیجک امور ران درمر نے ایران کے ساتھ جاری امریکی جوہری مذاکرات کے کلیدی نمائندے اسٹیو ویٹکاف کے مؤقف کو تبدیل کرنے کی بھرپور کوشش کی لیکن انہیں ناکامی کا سامنا کرنا پڑا۔

رپورٹ کے مطابق، یہ ملاقات جمعہ کے روز پیرس میں خفیہ طور پر ہوئی، جو کہ امریکہ اور ایران کے درمیان روم میں ہونے والے دوسرے غیر مستقیم مذاکراتی دور سے صرف ایک دن قبل تھی۔

 اسرائیلی حکام کا مقصد ویٹکاف کو قائل کرنا تھا کہ وہ ایران کے ساتھ نرم مؤقف ترک کر کے سخت گیرانہ پالیسی اپنائیں، لیکن وہ اس کوشش میں کامیاب نہ ہو سکے۔

یروشلم پوسٹ نے لکھا ہے کہ اگرچہ بارنیا نے حالیہ دنوں میں سی آئی اے کے سربراہ جان ریٹکلف سے کامیاب ملاقاتیں کی ہیں، لیکن اسٹیو ویٹکاف ایک زمانہ شناس اور با اختیار شخصیت سمجھے جا رہے ہیں اور تل ابیب کے لیے ان پر اثر ڈالنا آسان نہیں۔

یہ اعتراف دراصل اسرائیل کی بڑھتی ہوئی مایوسی کو ظاہر کرتا ہے، جو ایران کے ساتھ ممکنہ نئے جوہری معاہدے کے خلاف ہے اور چاہتا ہے کہ امریکہ زیادہ سے زیادہ دباؤ اور سختی کی پالیسی اپنائے۔

اس انکشاف سے ایک بات واضح ہو رہی ہے کہ تل ابیب اب ہر امریکی نمائندے پر اثر انداز ہونے میں کامیاب نہیں ہو رہا۔ اگر اسٹیو ویٹکاف اپنی پالیسی پر قائم رہتے ہیں تو یہ اسرائیل کے لیے ایک سفارتی دھچکا ہو گا کیونکہ وہ ہمیشہ سے ایران کے خلاف سخت گیر موقف کے لیے امریکہ پر دباؤ ڈالتا رہا ہے۔

مزید پڑھیں:صیہونیوں کی ایران-امریکہ مذاکرات کے بارے میں امریکی پالیسی پر اثراندازی کی کوشش

اس سے یہ امکان بھی بڑھتا ہے کہ امریکہ ایران سے کسی عملی معاہدے کی طرف پیش رفت کرے چاہے اسرائیل اسے ناپسند ہی کیوں نہ کرے۔