کیا چین امریکہ کے آگےجھک جائے گا؟ امریکہ کا دعوی

سچ خبریں:واشنگٹن اور بیجنگ کے درمیان جاری تجارتی جنگ کے تناظر میں امریکہ نے دعویٰ کیا ہے کہ چین آخرکار اس ملک کے صدر ڈونلڈ ٹرمپ کی جانب سے چینی مصنوعات پر عائد کردہ ٹیرف کے معاملے پر امریکہ کے ساتھ معاہدہ کرنے پر مجبور ہو جائے گا۔

یہ بھی پڑھیں: امریکہ اور چین کے درمیان محاذ آرائی: 2025 میں دنیا کی غیر متنازعہ طاقت کون ہو گا؟

قطری نشریاتی ادارے الجزیرہ کی رپورٹ کے مطابق، امریکی وزارت خارجہ کی ترجمان ٹامی بروس نے فاکس نیوز کو دیے گئے ایک انٹرویو میں کہا کہ چین تجارتی ٹیرف کے معاملے پر شدید کنفیوژن کا شکار ہے اور ٹرمپ انصاف پر مبنی تجارتی نظام قائم کرنے کے لیے پرعزم ہیں۔

ٹامی بروس نے تجارتی جنگ کی تازہ صورتحال پر بات کرتے ہوئے کہا کہ چین موجودہ حالات کا بغور جائزہ لے رہا ہے تاکہ یہ طے کر سکے کہ آیا وہ اس بحران سے خود کو نکال پائے گا یا نہیں۔

انہوں نے مزید کہا کہ چین ٹیرف کے موضوع پر ایک قسم کی پالیسی سازی کی مشق کر رہا ہے جس میں اسے مہارت حاصل نہیں۔ آخرکار یہ صورتِ حال امریکا کے مفاد میں ختم ہو گی۔

امریکی ترجمان کا مزید کہنا تھا کہ چین فوری طور پر معاہدے کی طرف بڑھنے کے بجائے، اپنی ردعمل کی شدت میں اضافہ کر رہا ہے، جو اس کی الجھن اور پریشانی کی واضح علامت ہے۔

ٹامی بروس کے بقول، امریکہ کو یقین ہے کہ چین بالآخر مذاکرات کی میز پر واپس آئے گا اور ایک جامع معاہدے پر آمادہ ہو گا۔

انہوں نے اپنی بات جاری رکھتے ہوئے دعویٰ کیا کہ دنیا بھر کے وہ ممالک جن کے اقتصادی مفادات وابستہ ہیں، وہ امریکا کے ساتھ معاہدہ کرنے میں دلچسپی رکھتے ہیں، کیونکہ امریکا آج بھی عالمی تجارت اور سفارتکاری کا مرکز ہے۔

آخر میں انہوں نے ٹرمپ کی اقتصادی پالیسیوں کی تعریف کرتے ہوئے کہا کہ ٹرمپ پرعزم ہیں کہ امریکا کو منصفانہ تجارتی نظام دلایا جائے، جو کہ امریکی عوام کی بھی خواہش ہے۔

مزید پڑھیں: 2025 میں امریکہ اور چین کے درمیان تصادم کا امکان: امریکی کمانڈر

ان کا دعویٰ تھا کہ اب تک 135 ممالک امریکہ سے تجارتی معاہدوں پر بات چیت کے لیے رابطہ کر چکے ہیں۔