ایران کے خلاف جنگ جے ڈی وینس کی صدارتی امیدواری کی راہ میں سب سے بڑی رکاوٹ: سی این این

?️ 14 نومبر 2026

سچ خبریں:سی این این کے مطابق، امریکی نائب صدر جے ڈی وینس 2028 کے صدارتی انتخابات میں ریپبلکن امیدوار بننے کے حوالے سے تذبذب کا شکار ہیں۔ ٹرمپ کی غیر مقبول پالیسیوں، خصوصاً ایران کے خلاف جنگ اور میگا اتحاد میں دراڑوں نے ان کے سیاسی مستقبل کو غیر یقینی بنا دیا ہے۔

امریکی نشریاتی ادارے سی این این نے اپنی رپورٹ میں انکشاف کیا ہے کہ وسط مدتی انتخابات میں ریپبلکن پارٹی کی بھاری شکست کے بعد نائب صدر جے ڈی وینس نے 2028 کے صدارتی انتخابات میں امیدوار بننے سے دستبرداری کے امکان پر سنجیدگی سے غور کیا ہے۔

رپورٹ کے مطابق، وینس نے ابھی تک کوئی حتمی فیصلہ نہیں کیا، تاہم ان کے قریبی حلقے کے 12 افراد کا کہنا ہے کہ امریکی نائب صدر میگا (MAGA) اتحاد کے بکھرنے کے تناظر میں اپنی صدارتی امیدواری کے بارے میں شکوک و شبہات کا شکار ہیں۔

گزشتہ چند ہفتوں کے دوران وینس کی تشویش ایک بنیادی سوال کے گرد مرکوز رہی ہے: کیا وہ یا ریپبلکن پارٹی کا کوئی دوسرا امیدوار ٹرمپ کی پالیسیوں کے نتیجے میں پیدا ہونے والے موجودہ سیاسی ماحول میں کامیابی حاصل کر سکتا ہے؟

سی این این کی رپورٹ میں کہا گیا ہے کہ ایران کے ساتھ جنگ وینس کے سیاسی فیصلوں اور مستقبل کی حکمت عملی میں اہم ترین عوامل میں شامل ہے۔ ان کے اتحادی اس جنگ کو وینس کی صدارتی امیدواری کے سامنے سب سے بڑی رکاوٹ قرار دیتے ہیں۔

رپورٹ کے مطابق، وینس کے سیاسی مستقبل کا ایک اہم پہلو اس بات سے جڑا ہے کہ آیا صدر ڈونلڈ ٹرمپ عوامی اعتماد کو مزید نقصان پہنچائے بغیر اس غیر مقبول جنگ کو جلد ختم کرنے میں کامیاب ہو سکتے ہیں یا نہیں۔

یوں ایران کے خلاف جنگ نہ صرف ٹرمپ انتظامیہ کے لیے سیاسی دباؤ کا سبب بن رہی ہے بلکہ 2028 کے صدارتی انتخابات میں جے ڈی وینس کی ممکنہ امیدوار ی کے امکانات پر بھی اثر انداز ہو رہی ہے۔