غزہ کا محاصرہ توڑنے کے لیے 32 ممالک کے عوام کی آواز

سچ خبریں:دنیا کے 32 ممالک کے شہریوں نے غزہ کا محاصرہ ختم کرنے کے لیے عالمی مارچ کا آغاز کر دیا، اس مارچ کا مقصد اسرائیلی مظالم کی روک تھام، فوری انسانی امداد کی فراہمی اور رفح بارڈر کھلوانا ہے۔ 

الجزیرہ نیوز چینل کی رپورٹ کے مطابق غزہ کی مسلسل ناکہ بندی اور اسرائیلی حملوں کے خلاف دنیا کے 32 ممالک کے انسانی حقوق کے کارکنان اور سول سوسائٹی کے اتحاد نے عالمی مارچ برائے غزہ کا آغاز کیا ہے،یہ اقدام عالمی سطح پر غزہ میں جاری انسانی بحران، خوراک و ادویات کی شدید قلت اور اسرائیلی مظالم کے خلاف بھرپور آواز اٹھانے کی کوشش ہے۔

یہ بھی پڑھیں:صیہونیوں کی فلسطینیوں کے خلاف ایک اور مکروہ حقیقت منظر عام پر

رپورٹ کے مطابق، اس مارچ میں شامل شرکاء مختلف ممالک سے تعلق رکھتے ہیں اور ان کا مقصد غزہ کے محاصرے کو توڑنا، فوری امداد کی رسائی کو ممکن بنانا اور اسرائیل کی جانب سے جاری انسانی حقوق کی خلاف ورزیوں کو عالمی سطح پر بے نقاب کرنا ہے۔

اس مارچ کے اہم اہداف میں شامل ہیں:

1. غزہ میں نسل کشی اور جنگی جرائم کو روکنا:

   شرکاء کا کہنا ہے کہ اسرائیلی حملوں کے نتیجے میں غزہ میں بڑے پیمانے پر انسانی جانیں ضائع ہو رہی ہیں، اور دنیا کو متحد ہو کر ان جرائم کو روکنا چاہیے۔

2. انسانی امداد کی فوری اور براہ راست فراہمی:

   مارچ کا بنیادی مطالبہ ہے کہ رفح بارڈر کو فی الفور اور بغیر کسی شرط کے کھولا جائے تاکہ خوراک، پانی، ادویات اور دیگر ضروری اشیاء غزہ کے عوام تک براہ راست پہنچ سکیں۔

3. محاصرہ کا مکمل خاتمہ اور مستقل انسانی راستہ:

   شرکاء اس بات پر زور دے رہے ہیں کہ غزہ کا محاصرہ ہمیشہ کے لیے ختم کیا جائے اور انسانی بنیادوں پر ایک محفوظ اور مستقل راستہ مہیا کیا جائے۔

4. عالمی رائے عامہ اور حکومتوں پر دباؤ:

   یہ اتحاد دنیا بھر کے پارلیمان، سیاسی حلقوں اور میڈیا سے اپیل کر رہا ہے کہ وہ اسرائیلی مظالم کے خلاف اپنی آواز بلند کریں اور اپنی حکومتوں پر دباؤ ڈالیں کہ وہ اس سلسلے میں عملی اقدامات کریں۔

5. جنگی جرائم کے مرتکبین کا احتساب:

   اتحاد کا مطالبہ ہے کہ ان جرائم میں ملوث تمام افراد اور اداروں کو بین الاقوامی عدالت میں پیش کیا جائے اور عالمی ادارے اپنی قانونی و اخلاقی ذمہ داریاں نبھائیں۔

اس عالمی مارچ کے شرکاء مختلف جغرافیائی گروپوں میں تقسیم ہیں اور ان سب کی منزل مصر کا رفح بارڈر ہے، جو غزہ کے واحد زمینی راستہ ہے۔

اتحاد کے سربراہ سیف ابو کشک کے مطابق، اب تک 10 ہزار سے زائد افراد اس مارچ کا حصہ بن چکے ہیں اور یہ تعداد مزید بڑھ رہی ہے۔

ان گروپوں کے ارکان اپنی ذاتی وسائل سے اس سفر میں شریک ہو رہے ہیں اور ان کے لیے بنیادی سطح پر ہی مدد فراہم کی جائے گی۔

مارچ کے شرکاء 12 جون سے قاہرہ کی طرف سفر شروع کریں گے اور پھر وہاں سے العریش پہنچیں گے۔

العریش سے وہ پیدل رفح بارڈر تک جائیں گے اور اس کے بعد غزہ میں داخلے کی کوشش کریں گے۔

ابو کشک کا کہنا ہے کہ صحرا میں پیدل سفر کے چیلنجز کے باوجود، یہ قدم غزہ کے عوام کی مشکلات کے مقابلے میں بہت چھوٹا ہے۔

منتظمین کا کہنا ہے کہ اس مارچ کا مقصد نہ صرف اسرائیلی محاصرے کو چیلنج کرنا ہے بلکہ عالمی برادری اور میڈیا کی توجہ اس انسانی بحران کی طرف مبذول کروانا بھی ہے۔

مزید پڑھیں:صیہونی فوج کا فلسطینیوں کو انسانی ڈھال بنانے کا اعتراف

شرکاء نے دنیا کے بڑے میڈیا اداروں سے اپیل کی ہے کہ وہ اس مارچ کو کوریج دیں اور اسرائیلی جرائم کو اجاگر کریں۔

ساتھ ہی عالمی اداروں، اقوام متحدہ اور دیگر فورمز سے مطالبہ کیا گیا ہے کہ وہ فوری طور پر رفح بارڈر کو کھولنے اور غزہ تک امداد پہنچانے میں کردار ادا کریں۔