امریکہ کا کیوبا پر فوجی حملے کا منصوبہ؛ امریکی میگزین کا انکشاف

?️ 19 مئی 2026

سچ خبریں:امریکی جریدے پالٹیکو نے دعویٰ کیا ہے کہ ٹرمپ انتظامیہ کیوبا کے خلاف فوجی کارروائی کی تیاری کر رہی ہے۔ اقتصادی پابندیوں اور تیل کی ناکہ بندی کے ناکام ہونے کے بعد پینٹاگون اب فضائی حملوں اور زمینی مداخلت جیسے آپشنز پر غور کر رہا ہے۔

باوثوق ذرائع کے حوالے سے یہ انکشاف سامنے آیا ہے کہ ڈونلڈ ٹرمپ کی قیادت میں امریکی حکومت کیوبا کے خلاف فوجی کارروائی کی تیاریاں کر رہی ہے، کیونکہ کیوبا پر دباؤ ڈالنے کے لیے اقتصادی پابندیوں کی پالیسی بری طرح ناکام ہو چکی ہے۔

امریکی جریدے پالٹیکو کے مطابق، واشنگٹن کا ابتدائی منصوبہ یہ تھا کہ سخت پابندیوں (بنیادی طور پر تیل کی ناکہ بندی) اور وینزئیلا و ایران میں امریکی فوجی اقدامات کے ذریعے کیوبا کو مذاکرات اور اپنی شرائط ماننے پر مجبور کر دیا جائے گا۔

 تاہم، ایران کے ساتھ صورتحال خراب ہونے اور کیوبا کی جانب سے توقع سے زیادہ مزاحمت نے امریکی حساب کتاب بگاڑ دیے ہیں۔

رپورٹ میں بتایا گیا ہے کہ امریکی فوج کی کمان اب مختلف فوجی منظرناموں کا جائزہ لے رہی ہے،ان ممکنہ اقدامات میں کیوبا کی حکومت کو مراعات دینے پر مجبور کرنے کے لیے محدود فضائی حملوں سے لے کر مکمل طور پر حکومت کی تبدیلی کے لیے وسیع پیمانے پر زمینی مداخلت شامل ہے۔

پالٹیکو کا کہنا ہے کہ امریکی سدرن کمانڈ نے حالیہ ہفتوں میں آپریشنل پلاننگ کا عمل شروع کر دیا ہے اور کیوبا پر ممکنہ حملے کے مختلف پہلوؤں پر عملی کام کا آغاز کر دیا گیا ہے۔

تجزیہ کاروں کا کہنا ہے کہ کیوبا کے خلاف اس ممکنہ فوجی اقدام کا مقصد خطے میں امریکی اثر و رسوخ کو دوبارہ قائم کرنا ہے، لیکن کیوبا کی مزاحمت اور عالمی حالات کے پیشِ نظر یہ مہم جوئی امریکہ کے لیے ایک نیا بحران پیدا کر سکتی ہے۔