امریکہ کی جانب سے یوکرین کو فوجی امداد کی مکمل معطلی کا امکان 

سچ خبریں: امریکی صدر ڈونلڈ ٹرمپ آج قومی سلامتی مشیروں سے اہم ملاقات کرنے والے ہیں جس میں یوکرین کی فوجی امداد معطل کرنے پر غور کیا جائے گا۔  

نیویارک ٹائمز کی رپورٹ کے مطابق، امریکی صدر ڈونلڈ ٹرمپ  آج (پیر) اپنے قومی سلامتی مشیروں سے ملاقات کر کے یوکرین کو فوجی امداد کی معطلی کے بارے میں گفتگو کریں گے۔

اخبار کے مطابق، جمعہ کو یوکرینی صدر ولودیمیر زلنسکی کے وائٹ ہاؤس کے دورے کے دوران سابق امریکی صدر ڈونلڈ ٹرمپ سے ان کی ملاقات کشیدہ رہی اور لفظی جھڑپ بھی ہوئی، اس پس منظر میں ٹرمپ آج اپنے مشیروں کے ساتھ یوکرین کے لیے فوجی امداد روکنے کے آپشنز پر غور کریں گے۔

یہ بھی پڑھیں:کیا ٹرمپ یوکرین کی ناشکری پر تعزیری اقدامات کریں گے ؟

نیویارک ٹائمز کے مطابق، ٹرمپ اپنے قومی سلامتی مشیروں کے ساتھ ان تمام آپشنز پر بات کریں گے، جن میں یوکرین کے لیے اسلحہ اور دیگر فوجی سازوسامان کی معطلی بھی شامل ہے، جو سابق صدر جو بائیڈن کے دور میں فراہم کیا جار ہا تھا۔

ٹرمپ حکومت کے ایک ترجمان نے تصدیق کی ہے کہ واشنگٹن میں آج ایک اہم اجلاس ہوگا، جس میں ٹرمپ اپنے سینئر قومی سلامتی مشیروں، وزیر خارجہ مارکو روبیو اور وزیر دفاع پِیٹ ہگسٹ کے ساتھ یوکرین کے حوالے سے سیاسی آپشنز پر تبادلہ خیال کریں گے۔

مزید پڑھیں: یوکرین کے اسٹریٹجک معدنی وسائل کیا ہیں؛ ٹرمپ چاہتے کیا ہیں؟

واضح رہے کہ یہ اجلاس یوکرین کے لیے امریکی امداد کے مکمل خاتمے یا اس میں بڑے پیمانے پر کٹوتی کا پیش خیمہ ثابت ہو سکتا ہے، جو اس جنگ زدہ ملک کے لیے ایک بڑا دھچکا ہوگا۔