امریکی خفیہ ادارے نے پاکستان کے خلاف بھارتی سازشوں کے بارے میں اہم انکشاف کردیا

?️ 15 اپریل 2021

واشنگٹن (سچ خبریں) امریکی خفیہ ادارے نے پاکستان کے خلاف بھارتی سازشوں کے بارے میں اہم انکشاف کرتے ہوئے کہا ہے کہ بھارتی انتہاپسند وزیراعظم پاکستان کے خلاف فوجی طاقت کا استعمال کرسکتا ہے۔

تفصیلات کے مطابق امریکی خفیہ ادارے نے کہا ہے کہ بھارتی وزیراعظم نریندر مودی کی زیر قیادت پاکستان کے خلاف ماضی کے مقابلے میں زیادہ شدت سے فوجی طاقت کا مظاہرہ کر سکتا ہے۔

غیر ملکی خبر رساں ادارے کے مطابق امریکی قومی انٹیلی جنس کے آفس کے ڈائریکٹر نے کانگریس میں پیش کی جانے والی اپنی سالانہ رپورٹ میں کہا ہے کہ اگرچہ پاکستان اور بھارت کے درمیان عام جنگ کا تو کوئی امکان نہیں تاہم دونوں ممالک کے درمیان بحران زیادہ شدت اور خطرناک صورتحال اختیار کر سکتا ہے۔

رپورٹ میں کہا گیا ہے کہ نریندر مودی کی قیادت میں اس بات کا قوی امکان ہے کہ بھارت ماضی کے مقابلے میں فوجی قوت کے ساتھ سمجھے جانے والے یا حقیقی پاکستانی اشتعال انگیزیوں کا زیادہ شدت کے ساتھ جواب دے اور اس کے نتیجے میں دونوں ممالک کے درمیان کشیدگی میں شدت پیدا ہو جس سے کشمیر میں پرتشدد بدامنی بھی پھیلے گی۔

رپورٹ میں کہا گیا ہے کہ افغانستان، عراق اور شام میں لڑائی کا براہ راست اثر امریکی فوج پر پڑتا ہے، جبکہ جوہری طاقتوں بھارت اور پاکستان کے درمیان کشیدگی دنیا کے لیے ایک تشویش کا باعث بنی ہوئی ہے۔