عراق میں صیہونی جاسوس کے بدلے ایرانی شہری کی ممکنہ رہائی کی قیاس آرائیاں

سچ خبریں:عراق میں صیہونی جاسوس الیزابت سورکوف کی رہائی کے لیے مذاکرات حتمی مراحل میں داخل ہو گئے ہیں،ذرائع کے مطابق، اس تبادلے میں ایک ایرانی شہری سمیت چند افراد کی رہائی کا امکان ہے، تاہم عراقی حکام نے سرکاری تصدیق سے گریز کیا ہے۔

ایک عراقی عہدیدار نے دعویٰ کیا ہے کہ عراق میں اسرائیلی جاسوس الیزابت سورکوف کی رہائی کے مذاکرات اپنے آخری مراحل میں داخل ہو گئے ہیں اور امکان ہے کہ اس کے بدلے میں ایک ایرانی شہری سمیت چند افراد کو رہا کیا جائے گا۔

یہ بھی پڑھیں:ایران میں صیہونی جاسوس گروہ تباہ

سعودی اخبار الشرق الاوسط کے لندن ایڈیشن کی رپورٹ کے مطابق، تین باخبر ذرائع، جن میں ایک عراقی سرکاری عہدیدار بھی شامل ہے، نے بتایا کہ عراق میں روسی شہریت کی حامل صیہونی جاسوس الیزابت سورکوف کی رہائی کے لیے مذاکرات حتمی مرحلے میں پہنچ چکے ہیں اور اب صرف رہائی کے عمل کو انجام دینا باقی ہے۔

ان ذرائع میں سے ایک نے اخبار کو بتایا کہ یہ مذاکرات بہت طویل اور مشکل رہے، تاہم آخرکار ایک معاہدہ طے پایا ہے جس میں تاوان کی ادائیگی بھی شامل ہے، اگرچہ اس کی تفصیلات ظاہر نہیں کی گئیں۔

الشرق الاوسط نے ایک باخبر ذریعے کے حوالے سے مزید بتایا کہ جس گروہ نے سورکوف کو قید کر رکھا ہے، اس نے اس شرط پر اس کی رہائی پر رضامندی ظاہر کی ہے کہ ان افراد کو بھی آزاد کیا جائے جن پر امریکہ کے مفادات کو نشانہ بنانے کا الزام ہے،عراقی ذریعے نے ان افراد کی شناخت ظاہر نہیں کی، لیکن یہ بتایا کہ ان میں سے ایک ایرانی شہری ہے،دوسرے ذریعے نے الشرق الاوسط کو بتایا کہ حتمی معاہدہ طے پا چکا ہے، تمام تفصیلات پر اتفاق ہو چکا ہے، اب صرف رہائی کا عمل باقی ہے۔

مزید پڑھیں:صیہونی جاسوس یونٹ 8200 کو غیرمعمولی بحران کا سامنا

ادھر، اس سعودی اخبار نے یہ بھی لکھا ہے کہ عراق کے قومی سلامتی کے مشیر کے ایک میڈیا عہدیدار نے اس معاہدے کے وجود سے لاعلمی کا اظہار کیا اور سورکوف کی رہائی کے حوالے سے تبصرہ کرنے سے گریز کیا،اسی دوران، ایک اور عراقی سیکیورٹی اہلکار نے الشرق الاوسط کو بتایا کہ ابھی تک عملی طور پر سورکوف کی رہائی نہیں ہوئی ہے۔