یورپ میں ہونے والے منظم جرائم کے بارے میں اہم انکشاف ہوگیا

?️ 13 اپریل 2021

ہنگری (سچ خبریں) امن کا جھوٹا دعویٰ کرنے والے یورپی ممالک میں ہونے والے منظم جرائم کے بارے میں اہم انکشاف ہوا ہے جس میں بتایا گیا ہے کہ کورونا وائرس کے بہانے مختلف یورپی ممالک میں جرائم پیشہ افراد میں شدید اضافہ ہوا ہے۔

تفصیلات کے مطابق یورپی پولیس کے ادارے یورو پول نے خطے میں منظم جرائم کی شرح میں ہوش ربا اضافے کا انکشاف کردیا ہے اور منظم جرائم سے متعلق یہ تجزیاتی رپورٹ ہنگری کے دارالحکومت میں عام کی گئی۔

رپورٹ میں تجزیہ کاروں کا کہنا ہے کہ جرائم پیشہ گروہوں نے کورونا وبا کا فائدہ اٹھاتے ہوئے مختلف یورپی ممالک میں اپنے قدم جما لیے ہیں۔

یورو پول نے واضح کیا کہ یورپی یونین میں منظم جرائم سے جتنا خطرہ آج ہے پہلے کبھی نہیں تھا، جرائم پیشہ گروہ یورپ میں اقتصادی مشکلات اور سماجی پریشانیوں کا فائدہ اٹھانے کی کوشش کر رہے ہیں، یہ حالات مجرموں کو اپنی سرگرمیاں بڑھانے میں مددگار ثابت ہو رہے ہیں اور وہ کھلے عام شہریوں، کاروبار اور عوامی شعبوں کو نشانہ بنا رہے ہیں۔

پولیس کا کہنا ہے کہ جرائم پیشہ گروہ یورپی ممالک کی اقتصادیات کو کمزور کرکے سرکاری اداروں پر قبضہ کرنے کی کوشش میں ہیں۔

یورو پول کے مطابق 70 فیصد منظم جرائم پیشہ نیٹ ورک 3یورپی ریاستوں میں اپنی سرگرمیاں جاری رکھے ہوئے ہیں۔

رپورٹ کے مطابق 40 فیصد گروہ منشیات کے دھندے میں ملوث ہیں، پیشہ ورانہ صلاحیتوں کی حامل کئی تنظیموں کے ان کے ساتھ گہرے روابط ہیں، ان تنظیموں نے کاروباری ادارے کھولے ہوئے ہیں، اور 80 فیصد جرائم پیشہ گروہ قانونی طور پر کاروبار کرتے ہیں، ان کے علاوہ 60 فیصد گینگ اپنے کاروبار کو وسعت دینے کے لیے بدعنوانی کا سہارا لے رہے ہیں۔