سعودی وزیر دفاع کی آیت اللہ خامنہ ای سے ملاقات؛ سعودی فرمانروا کا پیغام 

سچ خبریں:سعودی عرب کے وزیر دفاع خالد بن سلمان نے ایران کے رہبر انقلاب آیت اللہ خامنہ ای سے ملاقات کی، جس میں انہوں نے سعودی فرمانروا شاہ سلمان بن عبدالعزیز کا تحریری پیغام اور خصوصی سلام ایرانی رہبر کو پہنچایا، اس ملاقات کا مقصد دونوں ممالک کے درمیان دوطرفہ تعلقات کی بہتری اور علاقائی و عالمی امور پر تبادلہ خیال تھا۔

یہ بھی پڑھیں:سعودی عرب اور ایران کے تعلقات مثبت اور ٹھوس پیش رفت کی راہ پر گامزن 

خالد بن سلمان نے سوشل میڈیا پلیٹ فارم "ایکس” پر متعدد پوسٹس میں بتایا کہ یہ ملاقات شاہ سلمان کی خواہش پر انجام پائی۔

انہوں نے لکھا کہ میں نے آیت اللہ خامنہ ای کے ساتھ ملاقات میں شاہ سلمان کا پیغام اور ان کا سلام پیش کیا، ہم نے ایران و سعودی عرب کے درمیان باہمی تعلقات اور مشترکہ دلچسپی کے امور پر گفتگو کی۔

خالد بن سلمان نے ایران کے صدر مسعود پزشکیان سے بھی ملاقات کی، انہوں نے لکھا کہ اس نشست میں ایران و سعودی عرب کے تعلقات کو مزید مستحکم بنانے کے راستوں، علاقائی اور بین الاقوامی تبدیلیوں اور ان پر قابو پانے کی کوششوں پر تفصیلی بات چیت ہوئی۔

سعودی وزیر دفاع کا یہ دورہ ایسے وقت میں ہوا ہے جب مشرق وسطیٰ میں متعدد سفارتی تبدیلیاں رونما ہو رہی ہیں، خالد بن سلمان نے تہران میں ایران کے دیگر اعلیٰ حکام سے بھی ملاقاتیں کیں، جس سے ایران-سعودی تعلقات میں بہتری کے ایک نئے دور کے آغاز کی امید کی جا رہی ہے۔

مزید پڑھیں:سعودی عرب اور ایران کے تعلقات کی تازہ ترین صورتحال

یاد رہے کہ حالیہ برسوں میں ایران اور سعودی عرب کے درمیان کشیدگی میں کمی اور سفارتی تعلقات کی بحالی کی کوششیں تیز ہو چکی ہیں، جن میں چین سمیت کئی بین الاقوامی ثالث اہم کردار ادا کر رہے ہیں۔