سعودی ہٹ دھرمی کا پہلے سے زیادہ سخت جواب دیا جائے گا: انصار اللہ

?️ 15 جولائی 2026

سچ خبریں:انصار اللہ یمن کے رہنما علی العماد نے کہا ہے کہ یمن کا محاصرہ ہر صورت ختم کیا جائے گا، پروازوں کا سلسلہ جاری رہے گا اور سعودی عرب کی کسی بھی نئی ہٹ دھرمی کا پہلے سے زیادہ سخت جواب دیا جائے گا۔

المسیرہ کے مطابق انصار اللہ یمن کے سیاسی دفتر کے رکن علی العماد نے کہا ہے کہ یمن کا محاصرہ توڑنے کی جدوجہد ایک قومی ذمہ داری ہے، جس سے کسی صورت پیچھے نہیں ہٹا جا سکتا۔ انہوں نے کہا کہ یہ صرف ایک سیاسی اقدام یا فوجی دباؤ کا ذریعہ نہیں بلکہ یمنی عوام کے حقوق سے جڑا ایک بنیادی فریضہ ہے۔

انہوں نے کہا کہ یمنی قیادت اس راستے پر عوام سے کیے گئے اپنے عہد اور گزشتہ 11 برسوں سے جاری مشکلات کے پیش نظر گامزن ہے، اور سعودی رکاوٹوں کے باوجود محاصرہ ختم کرنے کی کوششیں جاری رہیں گی۔

علی العماد نے المسیرہ سے گفتگو کرتے ہوئے کہا کہ صنعا ہوائی اڈے پر سعودی حملے نے ایک بار پھر ریاض کے کردار کو بے نقاب کر دیا ہے۔ ان کے بقول سعودی عرب نے یمنی عوام کی مشکلات کی قیمت پر محاصرہ برقرار رکھنے اور امریکہ۔اسرائیل منصوبے کی خدمت کرنے کو ترجیح دی، حالانکہ وہ جانتا ہے کہ اس پالیسی کے تسلسل سے اسے بڑھتے ہوئے فوجی اور سلامتی کے نتائج کا سامنا کرنا پڑے گا۔

انہوں نے کہا کہ محاصرہ توڑنے کی کارروائیوں کے دوران یمن میں سرکاری اور عوامی سطح پر یکجہتی اس بات کا ثبوت ہے کہ یمنی عوام اپنی ذمہ داریوں کا بھرپور احساس رکھتے ہیں اور محاصرہ مکمل طور پر ختم ہونے تک اپنے حقوق کے حصول کے لیے پُرعزم رہیں گے۔

علی العماد نے مزید کہا کہ یمنی حکومت محاصرہ ختم کرنے کو لاکھوں یمنی شہریوں کے لیے اپنی براہ راست ذمہ داری سمجھتی ہے۔ انہوں نے کہا کہ بیرون ملک مقیم لاکھوں یمنی اپنے وطن واپسی کے منتظر ہیں، جبکہ علاج کے لیے سفر نہ کر سکنے کے باعث بہت سے یمنی اپنی جانوں سے ہاتھ دھو بیٹھے ہیں۔

انصار اللہ کے اس رہنما نے یمن کی مدد کے لیے پروازوں کے آغاز سے متعلق ایران کے اقدام کو سراہتے ہوئے کہا کہ ایران نے خطرات سے مکمل آگاہی کے باوجود یہ قدم اٹھایا۔

 ان کے مطابق ایرانی پائلٹ جذبۂ ایثار اور شہادت کے عزم کے ساتھ اس مشن پر روانہ ہوئے، حالانکہ انہیں معلوم تھا کہ انہیں ایسے دشمن کا سامنا ہے جو غیر فوجی طیاروں کو بھی نشانہ بنانے سے گریز نہیں کرتا۔

انہوں نے کہا کہ ایران واحد ملک تھا جس نے اسلامی اور انسانی ذمہ داری کا احساس کرتے ہوئے یمن کا ساتھ دیا، اور اس کا یہ اقدام اسلامی امت کے اتحاد اور عرب اتحاد کے محاصرے کا سامنا کرنے والے مظلوم عوام کی حمایت کی عملی مثال ہے۔

علی العماد نے اس بات کی بھی مذمت کی کہ سعودی عرب نے ایک غیر فوجی طیارے کو صنعا میں اترنے سے روکنے کے لیے حملہ کیا، جبکہ اسی وقت وہ اپنی سرزمین سے غیر ملکی جنگی طیاروں کو یمن پر بمباری کی اجازت دیتا ہے۔ انہوں نے کہا کہ یہ دوہرا معیار غیر منطقی ہے اور اب کسی کو دھوکا نہیں دے سکتا۔

انہوں نے مزید کہا کہ یمن کے سرکاری اداروں نے باہمی ہم آہنگی کے ساتھ اپنی ذمہ داریاں انجام دیں اور اب صنعا ہوائی اڈے کی بحالی کے ساتھ ساتھ پروازوں کی آمد و رفت کا سلسلہ بھی جاری رکھا جا رہا ہے۔

علی العماد نے زور دے کر کہا کہ دشمن کو یہ جان لینا چاہیے کہ یمن کا محاصرہ ہر صورت ختم ہو گا، پروازیں جاری رہیں گی، اور اگر سعودی عرب نے مزید ہٹ دھرمی کا مظاہرہ کیا تو اسے پہلے سے کہیں زیادہ سخت جواب دیا جائے گا۔ ان کے بقول اب تک ہونے والی کارروائیاں صرف ایک مضبوط انتباہ تھیں۔