ریاض (سچ خبریں) سعودی عرب نے کورونا وائرس کی شدت کے باعث پاکستان سمیت متعدد ممالک کے لیئے اہم اعلان کرتے ہوئے کہا ہے کہ کورونا وائرس کے کیسز میں اضافے کو دیکھتے ہوئے متعدد ممالک پر سفری پابندیاں عائد کی جارہی ہیں جن میں پاکستان بھی شامل ہے۔
تفصیلات کے مطابق سعودی ایوی ایشن نے پاکستان پر سفری پابندیاں عائد کرتے ہوئے کہا ہے کہ یہ سفری پابندیاں عالمی وبا قرار دیے جانے والے کورونا وائرس کے باعث کی گئی ہیں اور اس کا اطلاق پاکستان سمیت کئی ممالک پر ہوگا۔
بین الاقوامی میڈیا کے مطابق سعودی عرب کی جنرل اتھارٹی برائے سول ایوی ایشن کا کہنا ہے کہ سعودی شہری اور اقامہ رکھنے والے 72 گھنٹے کے اندر پاکستان سے سعودی عرب آسکتے ہیں جبکہ مقررہ وقت کے بعد کسی کو بھی ایئرپورٹ پر اترنے کی اجازت نہیں ہوگی اور اس حوالے سے باقاعدہ نوٹیفکیشن جاری کر کے ایئرلائنز انتظامیہ اور سول ایوی ایشن کو آگاہ کر دیا گیا ہے۔
نوٹیفکیشن کے مطابق سعودی عرب نے بھارت، فلپائن، سری لنکا اور انڈونیشیا پر بھی سخت سفری پابندیاں عائد کی ہیں اور ان ممالک کی فلائٹس کوسعودی عرب میں مکمل اترنے کی اجازت نہیں ہوگی جبکہ برطانیہ، کینیڈا اور اومان میں بھی پاکستانی مسافروں کے داخلے بند کردیئے گئے ہیں۔
خیال رہے پاکستان میں بھی کورونا وائرس کی یومیہ شرح مجموعی طور پر تجاوز کرچکی ہے اور کیسز کی تعداد تیزی سے بڑھ رہی ہے ،یہی وجہ ہے کہ متعدد ممالک نے پاکستان سے فضائی رابطہ معطل کر دیا ہے۔
