کیلیفورنیا میں امدادی ہیلی کاپٹر حادثے کا شکار، 2 افراد ہلاک

?️ 1 ستمبر 2026

سچ خبریں:امریکی ریاست کیلیفورنیا کے قریب طبی امدادی ہیلی کاپٹر سمندر میں گرگیا، حادثے میں 2 افراد ہلاک، 2 زخمی جبکہ ایک شخص لاپتا ہوگیا۔

امریکی ریاست کیلیفورنیا میں طبی امداد فراہم کرنے والا ایک ہیلی کاپٹر حادثے کا شکار ہوگیا، جس کے نتیجے میں 2 افراد ہلاک، 2 زخمی جبکہ ایک شخص لاپتا ہوگیا۔

ایسوسی ایٹڈ پریس کے مطابق، بدھ کی شب ایک طبی امدادی ہیلی کاپٹر امریکی ریاست کیلیفورنیا میں کاتالینا جزیرے کے قریب سمندر میں گرگیا، جس کے نتیجے میں 2 افراد جان کی بازی ہار گئے۔ حادثے میں 2 دیگر افراد کو اسپتال منتقل کردیا گیا، جبکہ ایک لاپتا مسافر کی تلاش جاری ہے۔

لاس اینجلس کے محکمہ فائر بریگیڈ کے حکام نے بتایا کہ بدھ کی رات 8 بجے سے کچھ دیر قبل ہیلی کاپٹر کے حادثے کی اطلاع ملنے کے بعد امدادی ٹیمیں جائے حادثہ پر پہنچیں اور ہیلی کاپٹر میں سوار 4 افراد کو سمندر سے نکال لیا۔ ان میں سے 2 افراد موقع پر ہی دم توڑ گئے، جبکہ 2 دیگر کو مستحکم حالت میں اسپتال منتقل کیا گیا۔

مقامی حکام کے مطابق، ہیلی کاپٹر کاتالینا جزیرے سے پرواز کرنے کے کچھ ہی دیر بعد حادثے کا شکار ہوا۔ ہیلی کاپٹر تقریباً 73 میٹر گہرے پانی میں موجود ہے اور لاس اینجلس کے ساحل سے تقریباً 35 کلومیٹر کے فاصلے پر گرا ہے۔

امریکی قومی ادارہ برائے ٹرانسپورٹیشن سیفٹی نے بھی حادثے کی وجوہات جاننے کے لیے تحقیقات شروع کردی ہیں۔ امریکی کوسٹ گارڈ، فائر بریگیڈ اور لاس اینجلس کے شیرف کے اہلکار بھی تلاش اور امدادی کارروائیوں میں حصہ لے رہے ہیں۔