صیہونی ریاست میں نیتن یاہو کے خلاف مظاہرے، قیدیوں کے تبادلے اور جنگ بندی کا مطالبہ

سچ خبریں:صیہونی ریاست کے مختلف شہروں میں شہریوں نے قیدیوں کے تبادلے اور غزہ میں جنگ بندی کے مطالبے کے ساتھ بنیامین نتن یاہو حکومت کے خلاف احتجاج کیا،مظاہرین نے حکومت کی پالیسیوں اور قیدیوں کے معاملے پر شدید تنقید کی۔

المیادین نیوز چینل کی رپورٹ کے مطابق صیہونی ریاست کے دارالحکومت تل ابیب اور بئر السبع سمیت متعدد علاقوں کے مختلف شہروں میں ہزاروں اسرائیلی شہری سڑکوں پر نکل آئے اور وزیر اعظم بنیامین نتن یاہو اور ان کی حکومت کی پالیسیوں کے خلاف شدید احتجاج کیا۔

یہ بھی پڑھیں:نیتن یاہو کے خلاف مظاہرے نہیں رکیں گے

رپورٹ کے مطابق، یہ مظاہرے ایسے وقت میں ہو رہے ہیں جب اسرائیلی معاشرے میں حکومت کی جانب سے حماس کے ساتھ قیدیوں کے تبادلے میں تاخیر اور غزہ میں جنگ کے تسلسل پر شدید بے چینی پائی جاتی ہے۔

مظاہرین نے مطالبہ کیا کہ اسرائیلی حکومت فوری طور پر حماس کے ساتھ قیدیوں کے تبادلے کے معاہدے پر عملدرآمد کرے تاکہ زیرحراست اسرائیلی قیدیوں کو واپس لایا جا سکے اور جنگ کا خاتمہ ہو۔

مظاہرین نے غزہ کی جنگ جاری رکھنے اور اسیران کے معاملے پر نتن یاہو کابینہ کی حکمت عملی کو ناکام قرار دیتے ہوئے کہا کہ غیر لچکدار اور غیر حقیقت پسندانہ شرائط کی وجہ سے قیدیوں کا تبادلہ اور جنگ بندی ممکن نہیں ہو رہی،احتجاج کرنے والوں نے بینرز اور پلے کارڈز اٹھا رکھے تھے جن پر قیدیوں کی رہائی اور جنگ بندی کے مطالبات درج تھے۔

انہوں نے حکومت پر الزام عائد کیا کہ اس کی ضد اور سیاسی مفادات نے معصوم قیدیوں کی زندگیاں خطرے میں ڈال دی ہیں اور معاشرے میں عدم اطمینان اور مایوسی کو جنم دیا ہے،سیاسی تجزیہ کاروں کا کہنا ہے کہ اندرونی دباؤ میں روز بہ روز اضافہ ہو رہا ہے اور اگر حکومت نے جلد قیدیوں کے تبادلے یا جنگ بندی کے حوالے سے کوئی فیصلہ نہ کیا تو اسرائیل کے سیاسی حالات مزید کشیدہ ہو سکتے ہیں۔

مزید پڑھیں:مقبوضہ علاقوں میں نیتن یاہو کے خلاف مظاہرے

یاد رہے کہ حماس اور اسرائیل کے درمیان قیدیوں کے تبادلے اور جنگ بندی کے لیے بین الاقوامی سطح پر بھی کوششیں جاری ہیں، لیکن اسرائیلی حکومت کی سخت شرائط اس عمل میں بڑی رکاوٹ بنی ہوئی ہیں۔