فلسطینی مزاحمتی قوتوں نے اسرائیل کو ذلت آمیز شکست سے دوچار کردیا: خالد مشعل

?️ 30 مئی 2021

بیروت (سچ خبریں)  فلسطین کی اسلامی تحریک مزاحمت حماس کے بیرون ملک سیاسی امور کے سربراہ خالد مشعل نے اسرائیل کی جانب سے فلسطینیوں کے خلاف جارحیت کو دہشت گردی قرار دیتے ہوئے کہا ہے کہ اگرچہ اسرائیلی دہشت گردی میں دنیا کی تمام بڑی طاقتیں اسرائیل کے ساتھ تھیں لیکن  10 مئی سے 21 مئی تک غزہ کی پٹی پر اسرائیلی حملے کے دوران فلسطینی مزاحمتی قوتوں نے صہیونی دشمن کو شرمناک شکست سے دوچار کیا ہے۔

ان کا کہنا ہے کہ لڑائی ابھی ختم نہیں ہوئی ہے، اس معرکے میں اللہ نے ہمیں نصرت اور آزادی کی خوش خبری دی ہے

تفصیلات کے مطابق خالد مشعل نے لبنان کی وادی البقاع میں نصرت مارچ سے خطاب میں کہا کہ ہم نے صہیونی دشمن کو بدترین شکست سے دوچار کیا ہے اور ہم نے اس معرکے میں شاندار کامیابی حاصل کی ہے۔

انہوں نے کہا کہ ہم خوشی کے ساتھ اپنی فتح کا جشن منا رہے ہیں۔ ہماری پاک سرزمین پر قابض دشمن کا کوئی مستقبل نہیں۔

انہوں نے کہا کہ اسرائیل میدان جنگ میں جو کامیابی حاصل نہیں کرسکا وہ سیاسی میدان میں‌ حاصل کرنا چاہتا ہے، دشمن ہمیں القدس اور الاقصیٰ، الشیخ جراح  کے معاملے میں مشتعل کررہا ہے اور اپنے جرائم کو عرب ممالک کے ساتھ دوستانہ تعلقات کی آڑ میں چھپانا چاہتا ہے۔

انہوں نے کہا کہ قابض دشمن ہمارے خلاف ہرمقام پر سازش کررہا ہے، انہوں نے کہا کہ امریکا اسرائیل کو محاذ جنگ پر پہنچنے والے نقصآن کا خسارہ پورا کرنے کی کوشش کررہا ہے۔