الحشد الشعبی کے ہاتھوں اہم داعشی دہشتگرد گرفتار

?️ 21 جنوری 2025

سچ خبریں:عراقی فورسز الحشد الشعبی نے انسداد دہشت گردی کی ایک کامیاب کارروائی میں بغداد میں داعش کے ایک اہم رکن کو گرفتار کر لیا ہے۔

المیادین نیوز چینل کی رپورٹ کے مطابق، عراقی فورسز الحشد الشعبی نے انسداد دہشت گردی کی ایک کامیاب کارروائی کے دوران داعشی عنصر کو الانبار سے بغداد تک تعاقب کے بعد حراست میں لیا گیا۔

یہ بھی پڑھیں: عراق میں داعش کا خاتمہ کیسے ممکن ہوا؟

الحشد الشعبی کی طرف سے جاری کردہ بیان میں کہا گیا ہے کہ گرفتار دہشت گرد ماضی میں الانبار میں داعش کے زیراثر علاقوں میں سرگرم تھا، وہ عراق کی سیکیورٹی فورسز کے خلاف متعدد دہشت گردانہ کارروائیوں میں ملوث رہا ہے،خفیہ اطلاعات کی بنیاد پر اس کا مسلسل تعاقب کیا گیا، جس کے بعد اسے دارالحکومت بغداد میں گرفتار کر لیا گیا۔

عراقی سیکیورٹی فورسز اور عوامی مزاحمتی گروہ داعش کے باقی ماندہ عناصر کے خلاف ملک بھر میں کارروائیاں جاری رکھے ہوئے ہیں،الانبار، نینویٰ اور دیگر علاقوں میں داعش کی موجودگی کے خاتمے کے لیے مسلسل آپریشن کیے جا رہے ہیں۔

الحشد الشعبی کی اس کامیابی کو عراقی حکومت اور عوام کی جانب سے سراہا جا رہا ہے، کیونکہ اس گرفتاری کو بغداد کی سیکیورٹی کے لیے ایک اہم پیش رفت قرار دیا جا رہا ہے۔

مزید پڑھیں: سامرا، عراق میں داعش کے خطرناک ترین مرکز کی تباہی

عراقی حکومت نے داعش کے خلاف اپنی حکمت عملی کو مزید سخت کرتے ہوئے سیکیورٹی فورسز کو انٹیلیجنس آپریشنز بڑھانے کی ہدایت دی ہے تاکہ دہشت گرد نیٹ ورک کو جڑ سے ختم کیا جا سکے۔