لبنان کو اسرائیل کے لیے کھیل کا میدان ہونا چاہیے:انتہاپسند صیہونی وزیر

?️ 22 جون 2026

سچ خبریں:صہیونی حکومت کے داخلی سلامتی کے وزیر ایتمار بن گویر نے سخت موقف اختیار کرتے ہوئے لبنان کے خلاف فوجی کارروائی جاری رکھنے پر زور دیا ہے۔

صہیونی حکومت کے وزیر ایتمار بن گویر نے لبنان میں فوجی کارروائی جاری رکھنے اور جنوبی لبنان کو اسرائیل کے کھیل کے میدان میں تبدیل کرنے کا مطالبہ کیا ہے، جبکہ خطے میں امریکہ اور اسرائیل کے درمیان سفارتی مشاورت بھی جاری ہے۔

رپورٹ کے مطابق، پیر کے روز صہیونی ٹیلی ویژن چینل 11 سے گفتگو میں بن گویر نے دعویٰ کیا کہ تل ابیب کو جنوبی لبنان میں مکمل آزادی کے ساتھ کارروائی کرنے کا حق ہونا چاہیے اور اس علاقے کو اسرائیل کے لیے کھیل کا میدان بنایا جانا چاہیے۔

بن گویر نے مزید کہا کہ اگر صہیونی فوج کو مکمل آزادی عمل حاصل ہو تو کم تعداد میں فوجیوں کے ساتھ بھی اپنے فوجی اہداف حاصل کیے جا سکتے ہیں۔

انہوں نے کسی بھی ممکنہ معاہدے کی مخالفت کرتے ہوئے صہیونی وزیر اعظم بنیامین نیتن یاہو کو مشورہ دیا کہ وہ امریکہ کے صدر ڈونلڈ ٹرمپ کے ساتھ تعلقات برقرار رکھیں لیکن لبنان میں جنگ بندی قبول نہ کریں۔

ان کے مطابق، ٹرمپ کے ساتھ احترام کے ساتھ بات چیت ضروری ہے لیکن لبنان میں جنگ بندی سے اتفاق نہیں کیا جا سکتا۔

بن گویر نے کہا کہ جنوبی لبنان میں فوجی کارروائیاں جاری رہنی چاہئیں تاکہ حزب اللہ کو دوبارہ اپنی صلاحیتیں بحال کرنے کا موقع نہ ملے۔

اس دوران صہیونی ذرائع ابلاغ نے رپورٹ دی ہے کہ لبنان کے محاذ پر نیہ صورتحال اور جنوبی لبنان میں فوجی تعیناتی کے حوالے سے مختلف منظرنامے زیر غور ہیں۔

چینل 12 کے مطابق، سیاسی اور سیکیورٹی حلقوں میں زرد لکیر کے پیچھے بعض علاقوں سے جزوی انخلا پر بھی بحث جاری ہے، جن میں قلعت الشقیف کا علاقہ شامل ہے۔

رپورٹ کے مطابق گزشتہ 24 گھنٹوں کے دوران واشنگٹن اور تل ابیب کے درمیان مشاورت کے ساتھ سیکیورٹی اور سیاسی سطح پر متعدد اجلاس منعقد ہوئے ہیں۔

معتبر ذرائع نے اس بات کی تردید کی ہے کہ امریکہ نے اسرائیل سے جنوبی لبنان سے مکمل انخلا کا باضابطہ مطالبہ کیا ہے، تاہم بعض رپورٹس کے مطابق اسرائیل خود مرحلہ وار انخلا کے منصوبے پر غور کر رہا ہے۔

چینل 12 کے مطابق اس معاملے پر صہیونی حکام کے درمیان اختلافات موجود ہیں، کچھ حکام ان علاقوں کو اسٹریٹجک اور علامتی طور پر اہم قرار دیتے ہوئے وہاں موجودگی برقرار رکھنے کے حق میں ہیں، جبکہ کچھ محدود انخلا کو سیاسی دباؤ کم کرنے کا ذریعہ سمجھتے ہیں۔

دوسری جانب صیہونی فوج نے اعلان کیا ہے کہ شمالی سرحدی علاقوں میں عائد پابندیاں ختم کر دی گئی ہیں، جسے معمول کی صورتحال کی طرف واپسی قرار دیا جا رہا ہے۔

اسی دوران چینل کان نے رپورٹ دی ہے کہ نیتن یاہو کے حکم پر جنوبی لبنان میں بعض فوجی کارروائیاں روک دی گئی ہیں۔

رپورٹس کے مطابق امریکہ اور اسرائیل کے درمیان مذاکرات کا ایک نیا دور واشنگٹن میں منگل کے روز متوقع ہے، جس میں جنوبی لبنان کی صورتحال پر بات چیت ہوگی۔

صہیونی ذرائع کے مطابق اسرائیل کوشش کر رہا ہے کہ جنوبی لبنان میں کسی بھی تبدیلی کو سیاسی معاہدے کا حصہ دکھایا جائے، نہ کہ امریکی دباؤ کا نتیجہ۔

حزب اللہ کے سیکریٹری جنرل نعیم قاسم نے کہا ہے کہ اسرائیل کو مکمل طور پر لبنان سے انخلا کرنا ہوگا اور کسی بھی سیکیورٹی زون کی اجازت نہیں دی جائے گی۔