یمن کی جنگ میں شمولیت اسرائیل کے لیے نیا اسٹریٹجک بحران: صیہونی اخبار کی رپورٹ

?️ 31 مارچ 2026

سچ خبریں:صیہونی اخبار معاریو کے مطابق یمن کی عوامی تحریک انصاراللہ کی جنگ میں شمولیت نے اسرائیل کے لیے ایران اور لبنان کے محاذوں کے ساتھ ایک نیا چیلنج کھڑا کر دیا ہے، جس سے فوجی وسائل پر شدید دباؤ بڑھ گیا ہے۔

صہیونی اخبار معاریو نے اپنی تازہ رپورٹ میں کہا ہے کہ یمن کی جنگ میں شمولیت نے اسرائیل کے لیے ایک نیا اور پیچیدہ جال بچھا دیا ہے، جس سے اس کے اسٹریٹجک مسائل اپنی انتہا کو پہنچ گئے ہیں۔

رپورٹ کے مطابق، انصاراللہ کی ممکنہ براہِ راست مداخلت نے صیہونی عسکری قیادت کو ایک نئے مخمصے میں ڈال دیا ہے کہ آیا وہ تیسرا محاذ کھولنے کے خطرے سے نمٹے یا پہلے سے جاری دو بڑے محاذوں پر توجہ مرکوز رکھے۔

معاریو کے مطابق، اس وقت اسرائیل بیک وقت دو شدید محاذوں پر برسرِ پیکار ہے

* ایران کا محاذ

* لبنان کا محاذ، جہاں حزب اللہ روزانہ تقریباً 200 راکٹ اور گولے فائر کر کے دباؤ بڑھا رہا ہے۔

رپورٹ میں کہا گیا ہے کہ صیہونی فوج کو ایران میں وسیع پیمانے پر اور کم وقت میں اہداف حاصل کرنے کی ذمہ داری دی گئی ہے، جبکہ لبنان میں زمینی افواج کو فضائی مدد فراہم کرنا بھی ناگزیر ہے۔

اسی دوران، یمن کی جانب سے ممکنہ حملوں نے اسرائیل کے لیے ایک تیسرا محاذ کھولنے کا خطرہ پیدا کر دیا ہے، جو تقریباً دو ہزار کلومیٹر دور ہونے کے باوجود اس کی عسکری حکمت عملی کو متاثر کر سکتا ہے۔

رپورٹ کے مطابق، صیہونی فوج کے اندر یہ سمجھ پائی جاتی ہے کہ ایران کی حکمت عملی یہ ہے کہ یمن کو جنگ میں شامل کر کے اسرائیل کی فضائیہ اور انٹیلیجنس وسائل کو تقسیم کیا جائے، تاکہ مرکزی محاذ (ایران) اور ثانوی محاذ (لبنان) پر دباؤ کم کیا جا سکے۔

ایک صہیونی عسکری ذریعے کے حوالے سے کہا گیا کہ ہر وہ طیارہ جو ہم یمن پر حملے کے لیے بھیجتے ہیں، اس کا مطلب ہے ایک طیارہ کم جو ایران میں اہداف کو نشانہ بنا سکتا تھا، اور ایک کم طیارہ جو لبنان میں زمینی افواج کی مدد کر سکتا تھا۔