اسرائیل سیکیورٹی نہیں بلکہ توسیع اور قبضے کے لیے جنگ کر رہا ہے:ترک وزیر خارجہ

?️ 18 اپریل 2026

سچ خبریں:ترکی کے وزیر خارجہ ہاکان فیدان نے کہا ہے کہ اسرائیل مشرق وسطیٰ میں جاری جنگ کو اپنی سیکیورٹی کے بہانے استعمال کرتے ہوئے مزید زمینوں پر قبضے کی کوشش کر رہا ہے۔

ترکی کے وزیر خارجہ ہاکان فیدان نے کہا ہے کہ اسرائیل اپنی سیکیورٹی کے بہانے لبنان اور شام کی مزید زمینوں پر قبضہ کرنے کی کوشش کر رہا ہے، جبکہ غزہ اور لبنان میں جنگی کارروائیوں کے سنگین انسانی نقصانات بھی سامنے آئے ہیں۔

انہوں نے انطالیہ میں منعقدہ ایک سفارتی فورم میں گفتگو کرتے ہوئے کہا کہ اسرائیل کا مقصد اپنی سیکیورٹی کو یقینی بنانا نہیں بلکہ مزید علاقوں پر قبضہ کرنا ہے، اور بنیامین نیتن یاہو کی حکومت اس مقصد کے لیے سیکیورٹی کو ایک جواز کے طور پر استعمال کر رہی ہے۔

ترک وزیر خارجہ کے مطابق اسرائیل پہلے ہی فلسطینی علاقوں پر قبضہ کیے ہوئے ہے، جن میں غزہ، مغربی کنارے اور مشرقی بیت المقدس شامل ہیں، اور اب وہ لبنان اور شام سے تعلق رکھنے والے علاقوں پر بھی اپنا کنٹرول قائم کرنے کی کوشش کر رہا ہے۔

ہاکان فیدان نے کہا کہ یہ ایک مسلسل توسیع پسندانہ اور قبضہ گیر پالیسی ہے جسے روکنا ضروری ہے۔ ان کے مطابق اسرائیل دنیا کو یہ تاثر دینے کی کوشش کر رہا ہے کہ وہ صرف اپنی سیکیورٹی کے لیے اقدامات کر رہا ہے، جو ایک گمراہ کن تصور ہے۔

اس دوران شام کے موجودہ حکمران ابو محمد الجولانی نے بھی صیہونی کارروائیوں پر تنقید کرتے ہوئے کہا کہ اسرائیل نے شام پر شدید حملے کیے ہیں، متعدد فوجی مقامات کو نشانہ بنایا ہے اور گولان کے قریب علاقوں پر بھی قبضہ کیا ہے۔

انہوں نے دعویٰ کیا کہ شام نے کشیدگی سے بچنے اور بحران کو مزید بڑھنے سے روکنے کے لیے سفارتی راستہ اختیار کیا ہے، کیونکہ ملک گزشتہ 14 سال سے جنگ کے اثرات سے متاثر ہے۔

دوسری جانب لبنان کے وزارت صحت سے وابستہ ایمرجنسی آپریشن سینٹر کے مطابق 2 مارچ سے شروع ہونے والے صیہونی حملوں میں اب تک 2294 افراد شہید اور 7544 زخمی ہو چکے ہیں۔

رپورٹ کے مطابق صرف گزشتہ 24 گھنٹوں میں 98 افراد شہید اور 359 زخمی ہوئے ہیں۔ اعداد و شمار میں بتایا گیا ہے کہ شہدا میں 177 بچے شامل ہیں جبکہ 704 بچے زخمی ہوئے ہیں۔

مزید کہا گیا ہے کہ 100 طبی کارکنان جان کی بازی ہار چکے ہیں اور 233 زخمی ہوئے ہیں۔ صیہونی حملوں کے باعث 6 اسپتال مکمل طور پر بند ہو چکے ہیں جبکہ امدادی اداروں پر 129 براہ راست حملوں کی بھی تصدیق کی گئی ہے۔