حماس کا صیہونی جیل عوفر میں فلسطینی قیدیوں پر تشدد کو جنگی جرم قرار، عالمی مداخلت کا مطالبہ

?️ 14 فروری 2026

سچ خبریں:حماس نے اسرائیلی جیل عوفر میں فلسطینی قیدیوں پر تشدد کی شدید مذمت کرتے ہوئے اسے جنگی جرم قرار دیا اور عالمی برادری سے فوری کارروائی کا مطالبہ کیا نیز اسرائیلی وزیر ایتمار بن گویر پر قیدیوں کو دھمکانے اور تشدد کی نگرانی کا الزام لگایا۔

المیادین نیوز چینل کی رپورٹ کے مطابق حماس نے اسرائیلی جیل عوفر میں فلسطینی قیدیوں پر ہونے والے تشدد کی شدید مذمت کرتے ہوئے اسے جنگی جرم اور بین الاقوامی قوانین کی کھلی خلاف ورزی قرار دیا ہے۔

یہ بھی پڑھیں: صیہونی جیلوں میں فلسطینی قیدیوں کے ساتھ کیا ہوتا ہے؟ رہا ہونے والی فلسطینی خواتین کی زبانی

رپورٹ کے مطابق، حماس نے صہیونی حکام کی جانب سے جاری کی گئی ان تصاویر کی سخت مذمت کی، جن میں جیل عوفر کے اندر فلسطینی قیدیوں پر وحشیانہ تشدد کے مناظر دکھائے گئے ہیں۔ حماس نے کہا کہ یہ تشدد اسرائیلی وزیر ایتمار بن گویر کی نگرانی میں کیا گیا اور یہ ایک نیا جنگی جرم اور قیدیوں سے متعلق بین الاقوامی انسانی قوانین کی کھلی خلاف ورزی ہے۔

حماس نے اپنے ایک پریس بیان میں کہا کہ فلسطینی قیدیوں کے خلاف جرائم پر عالمی برادری کی خاموشی، اور سزائے موت سے متعلق قوانین کی منظوری، قابض اسرائیلی حکومت کو فلسطینی عوام کے خلاف نسل کشی اور نسلی تطہیر کی پالیسی جاری رکھنے کی مزید ہمت دے رہی ہے، خصوصاً جیلوں کے اندر۔

بیان میں مزید کہا گیا کہ یہ جرائم عالمی اداروں اور دنیا کی حکومتوں کو ان کی انسانی، اخلاقی اور قانونی ذمہ داریوں کی یاد دہانی کراتے ہیں کہ وہ قابض قوتوں کو روکیں اور جیلوں کے اندر جاری مظالم کو ختم کروائیں۔

حماس نے فلسطینی قیدیوں کے تحفظ اور اسرائیلی حکام کو ان کے جرائم پر جوابدہ بنانے کے لیے فوری اور مؤثر اقدامات کا مطالبہ کرتے ہوئے زور دیا کہ قیدی ہماری ذمہ داری ہیں اور ہم ان کی مکمل آزادی تک ان کی منصفانہ جدوجہد سے دستبردار نہیں ہوں گے۔

ادھر اسرائیلی چینل 7 نے حال ہی میں ایسی تصاویر نشر کی ہیں جن میں اسرائیلی فوجیوں اور وزیر ایتمار بن گویر کے جیل پر چھاپے کے دوران فلسطینی قیدیوں پر حملے اور تشدد کے مناظر دکھائے گئے۔ ان کارروائیوں میں جیل کے کمروں کے اندر کیمیائی اور صوتی بم پھینکنے اور قیدیوں کو ہتھیاروں سے نشانہ بنانے کی اطلاعات سامنے آئی ہیں۔

مزید پڑھیں: صیہونی جیلوں میں فلسطینی خواتین قیدیوں کی حالت زار

رپورٹ کے مطابق، ایتمار بن گویر نے فلسطینی قیدیوں کو ماہ رمضان کے دوران کسی بھی قسم کی سرگرمی سے باز رہنے کی دھمکی دی اور جیلوں میں اپنے دورِ وزارت کے دوران کیے گئے سخت اقدامات پر فخر کا اظہار کرتے ہوئے قیدیوں کو سزائے موت دینے کی دھمکی بھی دی۔