صہیونی جیل میں غزہ کے ہیرو ڈاکٹر حسام ابوصفیہ پر تشدد اور اذیت میں اضافہ

?️ 3 ستمبر 2026

سچ خبریں:غزہ کے کمال عدوان اسپتال کے سربراہ ڈاکٹر حسام ابوصفیہ، جو دسمبر 2024 سے صہیونی حراست میں ہیں، کو مبینہ طور پر مسلسل تشدد، نیند سے محرومی اور دھمکیوں کا سامنا ہے جبکہ ان کی جسمانی و ذہنی حالت انتہائی تشویش ناک بتائی جاتی ہے۔

غزہ کے کمال عدوان اسپتال کے سربراہ ڈاکٹر حسام ابوصفیہ، جنہیں دسمبر 2024 میں صہیونی فوج نے گرفتار کیا تھا، اس وقت صہیونی جیل کی ایک قیدِ تنہائی میں انتہائی خراب جسمانی اور ذہنی حالات سے دوچار ہیں۔

الجزیرہ کے مطابق غزہ کے معروف ڈاکٹر اور کمال عدوان اسپتال کے سربراہ ڈاکٹر حسام ابوصفیہ کو 27 دسمبر 2024 کو شمالی غزہ پر صہیونی فوج کے وحشیانہ حملے اور اسپتال کو آگ لگائے جانے کے دوران گرفتار کیا گیا تھا۔ وہ اس وقت قابض حکومت کی جیلوں میں انتہائی نامساعد حالات میں قید ہیں۔

ڈاکٹر حسام ابوصفیہ نے اپنے وکیل کے ذریعے دشمن صہیونی جیل کی قیدِ تنہائی میں اپنی تازہ صورتحال بیان کرتے ہوئے کہا ہے کہ ان کی جسمانی حالت انتہائی خراب ہے۔

غزہ کے اس ڈاکٹر نے بتایا کہ جیل کے محافظ انہیں مسلسل ہاتھوں، لاتوں اور ڈنڈوں سے شدید تشدد کا نشانہ بناتے ہیں۔

انہوں نے مزید بتایا کہ صہیونی حکام رات بھر جان بوجھ کر شور شرابا کرتے اور لاؤڈ اسپیکر استعمال کرتے ہیں، جس کے باعث انہیں نیند سے بھی محروم رکھا جاتا ہے۔ ان کا کہنا تھا کہ انہیں مسلسل دھمکیوں اور تنبیہات کا سامنا رہتا ہے۔

ڈاکٹر ابوصفیہ نے اپنے وکیل کو بتایا کہ صہیونی حکام نے انہیں دھمکایا ہے اور جیل کے اندر پیش آنے والے واقعات کو منظر عام پر لانے سے خبردار کیا ہے۔

انسانی حقوق کے لیے کام کرنے والی تنظیم فزیشنز فار ہیومن رائٹس نے ڈاکٹر ابوصفیہ کی صورتحال سے متعلق اپنے تازہ بیان میں کہا ہے کہ تنظیم نے ان کے جسم پر ہونے والی سنگین چوٹوں کا جائزہ لیا ہے۔

 ان میں بائیں آنکھ کو شدید نقصان کے علاوہ سر، سینے اور جسم کے حساس حصوں پر مسلسل حملوں کے نتیجے میں آنے والی شدید چوٹیں بھی شامل ہیں۔

تنظیم نے زور دیا کہ اس نے متعدد مرتبہ ڈاکٹر ابوصفیہ کا خصوصی طبی معائنہ کرانے اور ایک آزاد ماہر ڈاکٹر کو جیل بھیج کر ان سے ملاقات کی اجازت طلب کی، تاہم صہیونی حکام نے ہر مرتبہ اجازت دینے سے انکار کیا۔

دریں اثنا، ڈاکٹر حسام ابوصفیہ پہلے ہی دل کے مسائل اور بلند فشارِ خون سمیت متعدد دائمی بیماریوں میں مبتلا ہیں، جبکہ حراست کے دوران ان کی صحت مسلسل بگڑتی جا رہی ہے۔