یوکرین کی فتح کی یورپی امیدیں محض وہم: امریکی نائب صدر

?️ 23 نومبر 2025

سچ خبریں:امریکی نائب صدر جے ڈی ونس نے کہا ہے کہ یورپ کی جانب سے یوکرین کی ممکنہ فوجی فتح کی امیدیں غیر حقیقت پسندانہ ہیں اور جنگ کا حل زیادہ اسلحہ اور پابندیوں کے بجائے حقیقت پسندانہ مذاکرات میں ہے۔

امریکہ کے نائب صدر جے ڈی ونس نے کہا ہے کہ روس کے خلاف جنگ میں یوکرین کی فتح کے لیے یورپی یونین کی امیدیں خیالی ہیں۔

یہ بھی پڑھیں:یوکرین جنگ کے خاتمے کے لیے امریکہ خفیہ طور پر روس سے مشاورت کر رہا ہے

جے ڈی ونس نے سوشل میڈیا پلیٹ فارم ایکس پر لکھا کہ یوکرین کو مزید فوجی امداد دینا اور روس پر سخت تر پابندیاں لگانا محض یہ سوچ کر کہ اس سے کیف کو فتح حاصل ہوگی، سراب کے سوا کچھ نہیں۔

 ان کے مطابق یہ تصور کہ اگر ہم صرف زیادہ پیسہ دیں، زیادہ ہتھیار بھیجیں یا پابندیاں بڑھا دیں تو فتح قریب آ جائے گی… حقیقت نہیں۔ امن اُن باوقار سیاستدانوں یا سفارتکاروں کے ذریعے نہیں آتا جو وہم میں جیتے ہیں، بلکہ اُن لوگوں کے ذریعے آتا ہے جو ہوشیار اور حقیقت پسند ہوں۔

انہوں نے مزید کہا کہ وہ افراد جو امریکہ کے یوکرین کے لیے پیش کردہ امن منصوبے کی مخالفت کر رہے ہیں، یا تو اس منصوبے سے واقف نہیں یا زمینی حالات کو سمجھنے میں ناکام ہیں۔

ونس کے مطابق، کسی بھی حل کا مقصد یہ ہونا چاہیے کہ وہ روس اور یوکرین دونوں کے لیے قابل قبول ہو اور مستقبل میں دوبارہ جنگ چھڑنے کے امکانات کو کم کرے۔

یہ بیانات ایسے وقت سامنے آئے ہیں جب امریکہ جنگِ یوکرین کے خاتمے کے لیے ایک نئے منصوبے پر کام کر رہا ہے اور محض فوجی امداد اور پابندیوں سے آگے کے راستوں پر غور کر رہا ہے۔

برطانوی اخبار گارڈین کے مطابق، امریکی فوج کے چند اعلیٰ جرنیل ممکن ہے کہ اسی ہفتے ماسکو جائیں تاکہ واشنگٹن کے امن منصوبے پر بات چیت کریں۔

رپورٹ کے مطابق، 20 نومبر کو امریکی وزیرِ فوج دانیل ڈرسکول کی سربراہی میں ایک امریکی وفد نے ڈونالد ٹرمپ حکومت کا امن منصوبہ ولودیمیر زلنسکی کو پیش کیا، اگلے روز روسی صدر ولادیمیر پوتین نے بھی کہا کہ ماسکو مذاکرات کے لیے تیار ہے اور 28 نکاتی امریکی نقشہ بحران کے حل کی بنیاد بن سکتا ہے۔

فائنانشل ٹائمز کے مطابق یہ منصوبہ کیف سے بڑے امتیازات کا مطالبہ کرتا ہے۔

مزید پڑھیں:ٹرمپ نے یوکرین جنگ کے خاتمے کے لیے 28 نکاتی منصوبے کی منظوری دے دی

روئٹرز نے لکھا کہ امریکہ نے یوکرین کو خبردار کیا ہے کہ اگر اس نے منصوبہ 27 نومبر تک قبول نہ کیا تو اسلحے کی فراہمی اور انٹیلی جنس تعاون روک دیا جائے گا۔