مصر میں ایک بار پھر ٹرین حادثہ، سینکڑوں افراد ہلاک اور زخمی ہوگئے

?️ 19 اپریل 2021

قاہرہ (سچ خبریں)   مصر میں اکثر ٹرین حادثات پیش آتے رہتے ہیں جن کی وجہ سے سینکڑوں افراد ہلاک اور زخمی ہوجاتے ہیں اور ابھی تازہ ترین اطلاعات کے مطابق ایک بار پھر خوفناک حادثہ پیش آیا ہے جس میں سینکڑوں افراد ہلاک اور زخمی ہوگئے ہیں۔

تفصیلات کے مطابق مصر کے شمالی صوبے قلیوبیہ میں مسافر ٹرین پٹری سے اتر گئی جس کے نتیجے میں درجنوں افراد ہلاک اور 97 افراد زخمی ہوگئے۔

الجزیرہ کی رپورٹ کے مطابق واقعے کے بعد 50 سے زائد ایمبولینسز کو جائے حادثہ اور بعد ازاں صوبے کے 3 ہسپتالوں کی جانب جاتے ہوئے دیکھا گیا۔

رپورٹ میں صوبائی حکام کے حوالے سے بتایا گیا کہ ٹرین کی کم سے کم 8 بوگیاں پٹری سے اتر گئیں تھیں، واقعے کے بعد سوشل میڈیا پر سامنے آنے والی ویڈیوز میں دیکھا جاسکتا ہے کہ ٹرین کے متعدد ڈبے پٹری کے اطراف میں الٹ گئے ہیں اور لوگوں کی بڑی تعداد ان کے پاس موجود ہے، رپورٹ میں بتایا گیا کہ فوری طور پر واقعے کی وجہ معلوم نہیں ہوسکی۔

خیال رہے کہ مصر میں حالیہ کچھ سالوں میں متعدد ٹرین حادثات رونما ہوئے ہیں، رواں سال مارچ میں مصر میں دو مسافر ٹرینیں ٹکرانے کی وجہ سے 20 افراد ہلاک اور 200 سے زائد زخمی ہوگئے تھے، اس کے علاوہ رواں ماہ کے آغاز میں ہی ایک مسافر ٹرین کے پٹری سے اُترنے کی وجہ سے 15 مسافر زخمی ہوگئے تھے۔

اس سے قبل 2019 میں قاہرہ کے مین ریلوے اسٹیشن میں دھماکے کے بعد آتشزدگی کی وجہ سے 25 افراد جھلس کر ہلاک ہوئے تھے، مذکورہ واقعے کے باعث اس وقت کے وزیر ٹرانسپورٹ نے استعفیٰ دے دیا تھا۔

یاد رہے کہ مصر کی تاریخ میں 2002 میں ہونے والا ٹرین کا حادثہ سب سے زیادہ خوفناک حادثہ تھا جس میں رات گئے چلتی ٹرین میں آتشزدگی کی وجہ سے 300 سے زائد افراد ہلاک ہوگئے تھے۔