غزہ میں منڈلاتے جنگ کے بادل، مصر اور اقوام متحدہ نے اہم اعلان کردیا

?️ 30 اپریل 2021

قاہرہ (سچ خبریں)  مصر اور اقوام متحدہ نے بیت المقدس میں کشیدگی کم کرنے اور غزہ میں منڈلاتے جنگ کے بادلوں کو دیکھتے ہوئے جنگ کے ان خطرات کو کم کرنے کے لیے متفقہ کوششیں جاری رکھنے کا اعلان کردیا ہے۔

تفصیلات کے مطابق مصر ی وزیر خارجہ سامع شکری اور مشرق وسطیٰ میں امن عمل کے لیے اقوام متحدہ کے مندوب ٹور ونسلینڈ نے بیت المقدس اور غزہ میں کشیدگی سے بچنے کے لیے رابطے تیز کرنے پر اتفاق کیا، وزیر خارجہ نے کہا کہ اردن، فرانس اور جرمنی کے ساتھ مصر کی مشترکہ کوششیں کی جا رہی ہیں۔

یاد رہے کہ صہیونی حکومت اور فلسطینی مزاحمت کاروں کے درمیان مقبوضہ علاقوں اور غزہ میں حالات کشیدہ ہیں، اور اسرائیلی فوج کا دعویٰ ہے کہ غزہ کی جانب سے حماس نے اسرائیل کی طرف راکٹ داغے، جس کے جواب میں اسرائیل نے تنظیم کے ٹھکانوں پر بمباری کی گئی ہے۔

دوسری جانب قابض فوج اور صہیونی پولیس کی فول پروف سیکورٹی میں یہودی شرپسندوں کے ہاتھوں مسجد اقصیٰ کی بے حرمتی کا سلسلہ جاری ہے۔

بدھ کے روز 134 یہودی آبادکاروں نے فوج اور پولیس کی فول پروف سیکورٹی میں مسجد اقصیٰ میں داخل کر مقدس مقام کی بے حرمتی کی۔

فلسطینی ذرائع ابلاغ کے مطابق یہودی آبادکاروں اور صہیونی انٹیلی جنس حکام سمیت کئی شرپسندوں نے مسجد اقصیٰ میں گھس کر بے حرمتی کی، یہودی آبادکار الگ الگ گروہوں کی شکل میں قبلہ اول میں داخل ہوئے اور مقدس مقامات کی توہین کی۔