87 فیصد عرب اسرائیل کے ساتھ تعلقات کو معمول پر لانے کے مخالف

سچ خبریں:واشنگٹن میں قائم عرب سینٹر کی جانب سے کیے گئے عرب رائے عامہ کے اشاریہ 2025 کے سروے کے مطابق، 15 عرب ممالک کے 28 فیصد شہری صیہونی حکومت کو اپنے ممالک کے لیے سب سے بڑا خطرہ قرار دیتے ہیں۔ 

واضح رہے کہ یہ سروے عرب دنیا میں رائے عامہ کا سب سے بڑا جائزہ تصور کیا جاتا ہے۔

یہ سروے نومبر 2024 سے اگست 2025 کے درمیان 15 عرب ممالک میں 40 ہزار 130 افراد کے ساتھ براہ راست انٹرویوز کے ذریعے کیا گیا۔

سروے کے نتائج کے مطابق، اسرائیل کو خطرہ سمجھے جانے کی سب سے زیادہ شرح 58 فیصد کے ساتھ مشرقی عرب خطہ (عراق، اردن، لبنان، فلسطین اور شام) میں ریکارڈ کی گئی۔ اس کے بعد دریائے نیل کا خطہ (مصر اور سوڈان) 38 فیصد کے ساتھ دوسرے نمبر پر ہے۔ اس کے برعکس، مغربی عرب اور خلیجی ممالک میں یہ شرح صرف 9 فیصد ہے۔

سروے سے ظاہر ہوتا ہے کہ 80 فیصد عرب فلسطین کے مسئلے کو ایک اجتماعی عربی مسئلہ سمجھتے ہیں، جبکہ صرف 12 فیصد اسے محض فلسطینیوں کا معاملہ گردانتے ہیں۔ اردن، تیونس، الجزائر اور کویت جیسے ممالک میں یہ تناظر 90 فیصد سے بھی تجاوز کر گیا ہے۔

نتائج کے مطابق، 87 فیصد شرکاء اسرائیل کو تسلیم کرنے کے مخالف ہیں جبکہ صرف 6 فیصد اس کی حمایت کرتے ہیں۔ مخالفین صیہونی حکومت کو "نوآبادیاتی، آبادکاری اور توسیع پسند ریاست” قرار دیتے ہیں۔ جبکہ حامیوں میں سے نصف نے اسرائیل کو تسلیم کرنے کی شرط آزاد فلسطینی ریاست کا قیام قرار دیا۔

اس سروے میں سعودی عرب 61 فیصد کے ساتھ تعلقات معمول پر لانے کی مخالفت میں سب سے کم شرح ریکارڈ کی گئی، تاہم جواب دہندگان کی ایک قابل ذکر تعداد نے اس حوالے سے اپنی رائے دینے سے گریز کیا۔