الشرع: شام غیرملکی سازشوں کے تجرباتی میدان میں تبدیل نہیں ہو سکتی

?️ 30 جون 2026

سچ خبریں: شام کی عبوری حکومت کے سربراہ نے اسرائیلی رژیم کی جارحیتوں کی مذمت کرتے ہوئے کہا ہے کہ شام کو بیرونی سازشوں کے تجربات کے لیے استعمال نہیں کیا جا سکتا۔

المیادین نیٹ ورک کے حوالے سے رپورٹ کے مطابق،احمد الشرع نے جنوبی شام میں عدم استحکام پیدا کرنے کی اسرائیلی کارروائیوں کی شدید مذمت کی۔

انہوں نے کہا: “شام بیرونی سازشوں کے تجربات کا میدان یا دوسروں کی خواہشات پر عمل درآمد کی جگہ نہیں ہے۔”

الشرع نے شام کی علاقائی سالمیت اور اس کے استحکام کے ساتھ مکمل وابستگی کا اعادہ کیا۔

دوسری جانب مقامی شامی ذرائع نے بتایا ہے کہ معریہ اور العارضہ نامی دیہات کے رہائشیوں نے سڑکیں بند کر دی ہیں تاکہ اسرائیلی فوج کی پیش قدمی کو روکا جا سکے۔

اسی طرح گزشتہ روز علی الصبح اسرائیلی افواج نے درعا کے مغربی دیہی علاقے میں واقع گاؤں “عابدین” پر دوبارہ حملہ کیا۔ اس دوران حملہ آور ہیلی کاپٹروں اور توپ خانے سے بھاری فائرنگ کی گئی۔

یہ کارروائیاں اس وقت ہوئیں جب مقامی آبادی نے اسرائیلی افواج کی نئی پیش قدمی کو روکنے کی کوشش کی، جس کے نتیجے میں دونوں طرف سے مسلح جھڑپیں بھی ہوئیں۔

جنوبی شام میں جاری یہ زمینی اور فضائی حملے اس پس منظر میں ہو رہے ہیں کہ اسرائیل نے یکطرفہ طور پر 1974 کے معاہدے کو ختم قرار دیتے ہوئے غیر قانونی طور پر بفر زون پر قبضہ کر لیا ہے۔

رپورٹ کے مطابق اسرائیلی کارروائیوں میں شہریوں پر براہِ راست حملے، چرواہوں اور بچوں کی گرفتاریاں، زرعی زمینوں کی تباہی و ہمواری، اور رہائشی و فوجی تنصیبات پر بمباری شامل ہے، جو مسلسل اس معاہدے کی خلاف ورزی ہے۔