یمنیوں کا ایک بار پھر سعودی تیل کمپنی پر میزائل حملہ

?️ 5 ستمبر 2021

سچ خبریں:یمنی فوج کا کہنا ہے کہ انھوں نے ایک بار پھر سعودی عرب کی سب سے بڑی تیل کمپنی آرامکو کو بیلسٹک میزائل سے نشانہ بنایا ہے۔
المسیرہ چینل کی رپورٹ مطابق یمنی فوج کے ترجمان یحیی سریع نے کہا ہے کہ یمنی فورسز نے سعودی عرب کی تیل کی کمپنی آرامکو پر ذوالفقار بیلسٹک میزائل سے حملہ کیا ہے، یمنی فوج کے ترجمان نے کہا کہ سعودی عرب کے دمام کے علاقہ التنورہ میں سعودی عرب کی تیل کی کمپنی آرامکو کو صماد 3 نامی 8 ڈرونز اور ذوالفقار بیلسٹک میزائل سے نشانہ بنایا گیا ہے۔

انھوں نے کہا کہ ساتویں دفاعی نامی کاروائی میں سعودی عرب کے اندر حملہ کیا گيا ہے اور یمنی فوج نے ثابت کردیا ہے کہ وہ سعودی عرب پر جب اور جہاں چاہیے جوابی کاروائي کرنے کی صلاحیت رکھتی ہے۔

یحیی سریع نے کہا کہ جدہ، جیزان اور نجران میں بھی سعودی عرب کی تیل کی کمپنی آرامکو کو 2 ڈرونز اور 5 بیلسٹک میزائلوں سے نشانہ بنایا گيا ہے۔ انھوں نے کہا کہ ہم سعودی عرب کی بربریت اور جارحیت کا منہ توڑ جواب دیتے رہیں گے۔

یادرہے کہ سعودی عرب مغربی ممالک کی حمایت سے کچھ عرب ریاستوں کے ساتھ مل کر گذشتہ چھ سال سے یمن پر جارحانہ کاروائیاں کر رہا ہے جس کے نتیجہ میں اس کے بنیادی ڈھانچے کی تباہی کے علاوہ اب تک سیکڑوں افراد شہید ہوچکے ہیں اس کے باجود اقوام متحدہ سمیت پوری عالمی برادری نے سعودی عرب کے خلاف اب تک کوئی کاروائی نہیں کی ہے، تاہم جب یمنی اپنا دفاع کرنے کے لیے جوابی کاروائی کرتے ہیں تو پوری دینا میں ہاہاکار مچ جاتی ہے۔