ہم ہر اُس معاہدے کی مخالفت کرتے ہیں جو چین کے مفادات کو قربان کرے :بیجنگ

ہم ہر اُس معاہدے کی مخالفت کرتے ہیں جو چین کے مفادات کو قربان کرے :بیجنگ

بیجنگ نے واضح الفاظ میں کہا ہے کہ وہ کسی ایسے معاہدے کو قبول نہیں کرے گا جو اس کے قومی مفادات کو نقصان پہنچائے۔

چین کی وزارت خارجہ کے ترجمان گوآ جیاکون نے پیر کے روز ایک پریس کانفرنس کے دوران، سویڈن میں چین اور امریکہ کے اعلیٰ اقتصادی حکام کے درمیان ہونے والے مذاکرات پر تبصرہ کرتے ہوئے کہا کہ بیجنگ کو امید ہے کہ امریکہ، چین کے ساتھ طے پانے والے اعلیٰ سطحی ٹیلیفونک مذاکرات کے نتیجے میں ہونے والے اہم معاہدوں پر عملدرآمد میں سنجیدگی دکھائے گا۔

اطلاعات کے مطابق، چین اور امریکہ کے درمیان تجارتی مذاکرات کا نیا دور آج سویڈن کے دارالحکومت اسٹاک ہوم میں واقع حکومتی عمارت "روزنباد” میں منعقد ہوگا، جس میں دونوں ممالک کے سینئر اقتصادی حکام شرکت کریں گے۔

ترجمان نے کہا کہ چین کا اقتصادی و تجارتی مؤقف ہمیشہ واضح اور مستحکم رہا ہے۔ انہوں نے کہا کہ دونوں فریقین کو چاہیے کہ برابری، باہمی احترام اور مشترکہ مفادات کی بنیاد پر بات چیت کو فروغ دیں، غلط فہمیوں کو کم کریں، تعاون کو مضبوط بنائیں، اور چین-امریکہ تعلقات کو مستحکم، صحت مند اور پائیدار ترقی کی راہ پر گامزن کریں۔

جب ان سے پوچھا گیا کہ اگر مذاکرات کے نتیجے میں کوئی کمزور یا غیرمثالی معاہدہ سامنے آئے تو کیا چین اسے قبول کرے گا، تو گوآ نے دو ٹوک انداز میں کہا کہ چین برابر کی سطح پر بات چیت اور مشاورت کے ذریعے اختلافات کے حل کا حامی ہے، اور عالمی اقتصادی تعاون کے لیے ایک مثبت ماحول کی حمایت کرتا ہے۔ تاہم، چین ہر اُس معاہدے کی سختی سے مخالفت کرے گا جو اس کے قومی مفادات کو نقصان پہنچائے۔