ہزاروں اسرائیلی فوجیوں نے قبل از وقت فوج چھوڑنےکا اعلان کردیا

?️ 13 نومبر 2025

ہزاروں اسرائیلی فوجیوں نے قبل از وقت فوج چھوڑنےکا اعلان کردیا

الجزیرہ کے مطابق، اسرائیل کے مختلف شعبوں کے فوجی اور افسران طویل جنگ اور فوجی قیادت میں متنازعہ تقرریوں کے باعث اپنی رخصتی میں تعجیل چاہتے ہیں۔ یہ صورتحال فوج میں گہرے عدم اطمینان اور ذہنی دباؤ کی نشاندہی کرتی ہے اور مستقبل میں اسرائیلی فوج کی صلاحیت پر منفی اثر ڈال سکتی ہے۔

اس کے ساتھ ہی اسرائیلی پارلیمنٹ کی ایک رپورٹ میں بتایا گیا ہے کہ پچھلے ۱۸ ماہ کے دوران خودکشیوں اور خودکشی کی کوششوں میں اضافہ ہوا ہے۔ جنوری ۲۰۲۴ سے جولائی ۲۰۲۵ کے دوران ۲۷۹ فوجیوں نے خودکشی کی کوشش کی، جن میں ۴۰ کیسز جان لیوا ثابت ہوئے۔ ۲۰۱۷ سے ۲۰۲۵ تک کل ۱۲۴ فوجیوں نے خودکشی کی، جن میں ۶۸ فیصد حاضر سروس، ۲۱ فیصد ریزرو اور ۱۱ فیصد مستقل افسران شامل ہیں۔ ۲۰۲۳ سے ریزرو فوجیوں میں خودکشی کے واقعات میں نمایاں اضافہ ہوا ہے۔

غزہ جنگ کے دوران فوجیوں کی ذہنی صحت بری طرح متاثر ہوئی اور لڑاکا یونٹس کے اہلکاروں میں خودکشی کی شرح ۷۸ فیصد تک پہنچ گئی۔ صرف ۱۷ فیصد فوجیوں نے دو ماہ قبل کسی فوجی ماہر نفسیات سے ملاقات کی تھی، جو نفسیاتی مدد کے نظام کی کمزوری کو ظاہر کرتا ہے۔

فوجیوں کی ذہنی صحت پر اثرات کی وجہ سے اکثر خودکشی کے واقعات طویل تعیناتی، خوفناک مناظر دیکھنے اور ساتھیوں کی ہلاکت سے منسلک ہیں۔ اسرائیلی فوج نے ردعمل میں افسران کی تربیت اور ذہنی دباؤ کی نگرانی کے نظام کو مضبوط کیا ہے اور ۲۰۰ مستقل اور ۶۰۰ ریزرو ماہرین نفسیات کو تعینات کیا ہے۔ تاہم ماہرین خبردار کر رہے ہیں کہ اگر جنگ کے نفسیاتی اثرات کا بروقت علاج نہ کیا گیا تو خودکشیوں اور فوج چھوڑنے کی نئی لہر اسرائیلی فوج کے لیے سنگین بحران بن سکتی ہے۔