گوتریش نے کیمیائی ہتھیاروں تک آسان رسائی کے بارے میں خبردار کیا ہے

?️ 30 نومبر 2025

گوتریش نے کیمیائی ہتھیاروں تک آسان رسائی کے بارے میں خبردار کیا ہے

اسپین کے دارالحکومت میڈرڈ میں منعقدہ امن اور سلامتی کانفرنس سے خطاب کرتے ہوئے اقوامِ متحدہ کے سیکریٹری جنرل انتونیو گوتریش نے خبردار کیا ہے کہ جدید سائنسی اور تکنیکی پیش رفت نے کیمیائی ہتھیاروں تک رسائی کو پہلے سے کہیں زیادہ آسان بنا دیا ہے، جس کے باعث عالمی سلامتی ایک نئے اور سنجیدہ خطرے سے دوچار ہو چکی ہے۔ ان کا کہنا تھا کہ ایسے ہتھیاروں کا پھیلاؤ نہ صرف جنگی صورتحال کو مزید پیچیدہ کر دے گا بلکہ دہشت گرد گروہوں کے لیے بھی تباہ کن امکانات پیدا کرسکتا ہے۔

گوترش نے بین الاقوامی برادری پر زور دیا کہ وہ کیمیائی ہتھیاروں کی روک تھام کے عالمی معاہدوں پر سختی سے عمل کرائے، نگرانی کے نظام کو مضبوط بنائے اور نئی ٹیکنالوجیز کے ممکنہ غلط استعمال کو روکنے کے لیے مشترکہ حکمتِ عملی اختیار کرے۔ انہوں نے اس خدشے کا اظہار بھی کیا کہ مصنوعی ذہانت اور بائیوٹیکنالوجی کے میدان میں ہونے والی تیز رفتار جدت نے غیر ریاستی عناصر کے لیے خطرناک راستے کھول دیے ہیں جن کا سدباب نہ کیا گیا تو نتائج انتہائی سنگین ہو سکتے ہیں۔

دوسری جانب ایران میں ’خاموش شہدا‘ کی یاد میں خصوصی تقریبات منعقد کی گئیں جن میں ان شہریوں کو خراجِ عقیدت پیش کیا گیا جو کیمیائی حملوں کا نشانہ بنے تھے۔ ایرانی حکام نے ایک بار پھر عالمی قوتوں سے مطالبہ کیا ہے کہ وہ کیمیائی ہتھیاروں کی مکمل روک تھام اور متاثرین کی حمایت کے لیے عملی اقدامات کریں۔

ایران کی وزارتِ خارجہ نے اپنے بیان میں کہا کہ دنیا کو ان انسانیت سوز ہتھیاروں کے استعمال اور تیار کرنے والوں کے خلاف یکساں موقف اختیار کرنا ہوگا، کیونکہ اس میدان میں کسی بھی قسم کی چشم پوشی مستقبل کے بڑے سانحوں کی وجہ بن سکتی ہے۔