کیا زیلینسکی اور ٹرمپ مذاکرات کا نتیجہ یوکرین کے حق میں ہوگا ؟

سچ خبریں: جرمن سیکورٹی ماہر "پیٹر نویمان” نے اخبلڈ اخبار سے گفتگو میں کہا ہے کہ اتوار کے روز یوکرین کے صدر وولوڈیمیر زیلینسکی اور امریکی صدر ڈونلڈ ٹرمپ کے درمیان ہونے والی ملاقات سے یوکرین کے حق میں کوئی اہم پیشرفت ہونے کا امکان نہیں ہے۔

انہوں نے مزید کہا کہ ٹرمپ کے لیے، یوکرین روس کے ساتھ تعلقات معمول پر لانے میں صرف ایک رکاوٹ ہے، لہٰذا ٹرمپ کے ساتھ ملاقات کئیف کے لیے کوئی کامیابی نہیں ہوگی۔

اس جرمن ماہر نے کہا کہ مار-اے-لاگو مذاکرات کی کامیابی کا انحصار اس بات پر ہے کہ زیلینسکی روس کو کتنی رعایت دینے کے لیے تیار ہیں۔

وائٹ ہاؤس کی جانب سے جاری کردہ شیڈول کے مطابق، ڈونلڈ ٹرمپ کا اتوار کے روز فلوریڈا میں وولوڈیمیر زیلینسکی سے ملاقات کا پروگرام ہے۔ اس سے قبل، ٹرمپ نے پولیٹیکو میگزین کو انٹرویو میں کہا تھا کہ وہ جلد ہی روسی صدر ولادیمیر پوٹن سے بات کریں گے اور امید کرتے ہیں کہ یہ رابطہ اچھا رہے گا۔

اتوار کو زیلینسکی کے ساتھ ہونے والی ملاقات کا حوالہ دیتے ہوئے انہوں نے کہا کہ ان کا خیال ہے کہ پوٹن اور زیلینسکی کے ساتھ گفتگو اچھی طرح سے ہوگی۔

زیلینسکی نے کہا تھا کہ وہ ٹرمپ کے ساتھ ملاقات میں علاقائی مسائل پر بات کریں گے، جن میں ڈونباس سے یوکرینی فوجیوں کے ممکنہ انخلاء کے ساتھ ساتھ زاپوریژیا جوہری پاور پلانٹ کے استعمال کا طریقہ کار بھی شامل ہے۔

زیلینسکی نے 24 دسمبر کو روس کے ساتھ امن کے اپنے 20 نکاتی منصوبے کا اعلان کیا۔ اس منصوبے میں، انہوں نے ڈونباس سے دستبردار ہونے سے انکار اور 800,000 فوج رکھنے کے حق پر زور دیا ہے۔

روسی نائب وزیر خارجہ سیرگی ریابکوف نے اعلان کیا کہ زیلینسکی کا منصوبہ بنیادی طور پر اس 27 نکاتی منصوبے سے مختلف ہے جس پر روس نے دسمبر کے شروع سے اور گزشتہ ہفتوں کے دوران امریکی فریق کے ساتھ رابطوں میں بات چیت کی ہے۔