کیا امریکی حکومت بند ہونے والی ہے؟

کیا امریکی حکومت بند ہونے والی ہے؟

امریکی صدر ڈونلڈ ٹرمپ نے وہ ملاقات منسوخ کر دی ہے جو اس ہفتے بجٹ پر ڈیموکریٹس کے ساتھ ہونا تھی۔ اس فیصلے سے خدشہ بڑھ گیا ہے کہ اگر کانگریس یکم اکتوبر تک بجٹ پر اتفاق نہ کر سکی تو وفاقی حکومت بند ہو جائے گی۔

ٹرمپ نے اپنی سوشل میڈیا پلیٹ فارم ٹروتھ سوشل پر لکھا کہ ڈیموکریٹس کے مطالبات غیر سنجیدہ اور مضحکہ خیز  ہیں اور ان کے ساتھ بات چیت بے نتیجہ ہوگی۔ اس کے بعد جمعرات کو طے شدہ ملاقات بھی منسوخ کر دی گئی۔

امریکی قانون سازوں کے پاس یکم اکتوبر تک کا وقت ہے۔ اگر بجٹ پاس نہ ہوا تو وفاقی حکومت ۳۰ ستمبر کی رات سے بند ہو جائے گی۔ یہ پہلا موقع ہوگا جب ۲۰۱۹ کے بعد ایک بار پھر شٹ ڈاؤن کا خطرہ سر پر منڈلا رہا ہے۔

ریپبلکنز کو سینیٹ میں بجٹ کی منظوری کے لیے کم از کم سات ڈیموکریٹس کے ووٹ درکار ہیں۔ لیکن دونوں جماعتوں کے درمیان صحت عامہ اور دیگر سماجی امور پر سخت اختلافات ہیں۔

اگر حکومت بند ہوئی تو اس کے اثرات وسیع ہوں گے۔ ہر وفاقی ادارہ اپنے طور پر فیصلہ کرے گا کہ کون سے ملازمین بغیر تنخواہ کے کام کریں گے اور کن کو لازمی چھٹی پر بھیجا جائے گا۔