چین کے بڑھتے دباؤ کے درمیان تائیوان کا دفاعی بجٹ ریکارڈ سطح پر پہنچ گیا

چین کے بڑھتے دباؤ کے درمیان تائیوان کا دفاعی بجٹ ریکارڈ سطح پر پہنچ گیا

تائیوانی کابینہ نے اعلان کیا ہے کہ آئندہ سال کے لیے جزیرے کا دفاعی بجٹ نمایاں حد تک بڑھا کر 31.27 ارب ڈالر کر دیا جائے گا، جو ملک کی مجموعی قومی پیداوار (GDP) کا تقریباً 3.3 فیصد بنتا ہے۔ یہ 2009 کے بعد پہلا موقع ہے کہ تائیوان کا دفاعی بجٹ تین فیصد سے تجاوز کرے گا۔

یہ فیصلہ ایسے وقت میں کیا گیا ہے جب چین نے گزشتہ پانچ برسوں میں تائیوان پر سیاسی و فوجی دباؤ بڑھا دیا ہے تاکہ جزیرے کو سرزمینِ مادری کے ساتھ دوبارہ ملا لیا جائے۔ بیجنگ تائیوان کو اپنا علاقہ قرار دیتا ہے اور الحاق کے لیے فوجی طاقت کے استعمال کے امکان کو مسترد نہیں کرتا۔

تائیوان، جو چین کے دعوے کو تسلیم نہیں کرتا، واشنگٹن کے دباؤ کا بھی سامنا کر رہا ہے تاکہ وہ اپنی دفاعی اخراجات میں اضافہ کرے۔ امریکی دباؤ صرف تائیوان تک محدود نہیں بلکہ یورپی اتحادیوں پر بھی یہی مطالبہ ڈالا جا رہا ہے۔

تائیوانی صدر لای چینگ‌تے نے اس ماہ اعلان کیا کہ جزیرہ اپنے دفاعی اخراجات کو مجموعی قومی پیداوار کے تین فیصد سے اوپر لے جائے گا۔

چینی فضائیہ کے جنگی طیارے تقریباً روزانہ تائیوان کے فضائی حدود کے قریب پرواز کرتے ہیں جبکہ چین وقتاً فوقتاً جزیرے کے اردگرد بحری و فضائی مشقیں بھی کرتا ہے۔ تازہ ترین بڑی مشق رواں سال اپریل میں ہوئی تھی۔

چین نے بھی رواں سال اپنے دفاعی بجٹ میں 7.2 فیصد اضافہ کیا ہے جس کے بعد یہ بجٹ 248.17 ارب ڈالر تک جا پہنچا ہے۔ یہ اضافہ بیجنگ کی متوقع پانچ فیصد اقتصادی ترقی کے ہدف سے بھی زیادہ ہے۔