پاکستان نیا میزائل کمانڈ ہیڈکوارٹر قائم کرے گا

پاکستان نیا میزائل کمانڈ ہیڈکوارٹر قائم کرے گا

پاکستان کے وزیرِاعظم شہباز شریف نے اعلان کیا ہے کہ ملک میں ایک نیا میزائل کمانڈ ہیڈکوارٹر قائم کیا جائے گا تاکہ روایتی جنگی صلاحیت کو مزید مضبوط بنایا جا سکے۔

یومِ آزادی کی تقریب سے اسلام آباد میں خطاب کرتے ہوئے شہباز شریف نے کہا کہ یہ فورس جدید ٹیکنالوجی سے لیس ہوگی، جو ہر سمت سے دشمن کو نشانہ بنانے کی صلاحیت رکھے گی اور پاکستان کی دفاعی طاقت میں ایک اہم سنگ میل ثابت ہوگی۔

حالیہ چار روزہ پاک-بھارت جھڑپ کے دوران پاکستان نے دعویٰ کیا تھا کہ اس نے بھارتی جارحیت کے جواب میں زمین سے زمین پر مار کرنے والے طویل فاصلے تک پہنچنے والے رہنمائی یافتہ بیلسٹک میزائل ’’فتح‘‘ کا استعمال کیا۔

مئی کے اوائل میں بعض بھارتی میڈیا رپورٹس میں الزام لگایا گیا تھا کہ پاکستان نے اس جھڑپ میں شاہین بیلسٹک میزائل (جو ایٹمی وارہیڈ لے جانے کی صلاحیت رکھتا ہے) کا استعمال کیا، تاہم اسلام آباد نے اس دعوے کو بے بنیاد قرار دیتے ہوئے کہا کہ غیر مصدقہ اور اشتعال انگیز معلومات کا پھیلاؤ خطے کے استحکام کو نقصان پہنچاتا ہے۔

پاکستانی فوج کے مطابق، 7 مئی کو بھارتی حملے کے جواب میں اس نے 6 بھارتی جنگی طیارے مار گرائے، جن میں 3 فرانسیسی ساختہ’رافال بھی شامل تھے، اور 2 ایس-400 دفاعی نظام تباہ کیے۔ اس کارروائی میں پاکستان نے اپنے مقامی ’’جے ایف-17 اور چینی ساختہ’جے-10 سی  لڑاکا طیارے استعمال کیے۔

گزشتہ ہفتے پاکستانی وزیرِ دفاع نے بھارتی فضائیہ کے سربراہ کے اس بیان کو مسترد کر دیا تھا جس میں انہوں نے جھڑپ کے دوران کئی پاکستانی طیارے گرانے کا دعویٰ کیا تھا۔ وزیرِ دفاع نے کہا کہ اسلام آباد اس معاملے پر کسی بھی آزاد تحقیقاتی عمل میں شامل ہونے کے لیے تیار ہے۔