پاکستانی اخبارات میں رہبر معظم انقلاب اسلامی کے بیانات کی عکاسی،ایران ہرگز امریکہ کے سامنے نہیں جھکے گا

پاکستانی اخبارات میں رہبر معظم انقلاب اسلامی کے بیانات کی عکاسی،ایران ہرگز امریکہ کے سامنے نہیں جھکے گا

 پاکستان کے نمایاں اخبارات اور نیوز ویب سائٹس نے ایران کے رہبر معظم انقلاب اسلامی آیت اللہ سید علی خامنہ ای کے تازہ خطاب کو نمایاں طور پر شائع کیا ہے، جس میں انہوں نے واضح کیا کہ ایران امریکہ کے دباؤ کے سامنے ہرگز تسلیم نہیں ہوگا اور یورینیم کی افزودگی کا سلسلہ جاری رکھے گا۔

اردو روزنامہ جنگ نے لکھا کہ آیت اللہ خامنہ ای نے اپنے خطاب میں کہا کہ موجودہ حالات میں امریکہ سے مذاکرات ایران کے مفاد میں نہیں ہیں، اس لیے امریکہ کے ساتھ کوئی مذاکرات نہیں ہوں گے۔ انہوں نے اس بات پر بھی زور دیا کہ ایران کو ایٹمی ہتھیار بنانے کی نہ ضرورت ہے اور نہ ہی کوئی نیت، لیکن یورینیم افزودگی پر کسی دباؤ کو قبول نہیں کیا جائے گا۔

انگریزی روزنامہ دی نیوز نے اپنے تبصرے میں لکھا کہ رہبر انقلاب اسلامی نے امریکہ کے رویے کو "ڈکٹیشن” قرار دیتے ہوئے کہا کہ یہ مذاکرات نہیں بلکہ زبردستی ہے۔ امریکہ پہلے ہی اپنی مرضی کے نتائج طے کر چکا ہے، یعنی ایران کے ایٹمی پروگرام کو مکمل طور پر ختم کرنا۔

پاکستان کی معروف نیوز ویب سائٹ ڈان نے آیت اللہ خامنہ ای کے اس بیان کو نمایاں کیا کہ ایران کو یورینیم افزودگی کے حق سے دستبردار ہونے پر مجبور نہیں کیا جا سکتا۔ انہوں نے کہا کہ امریکہ کے ساتھ مذاکرات کسی بند گلی سے کم نہیں اور اس کا کوئی فائدہ عوام کو نہیں ہوگا۔

روزنامہ اوصاف نے اپنے تبصرے میں لکھا کہ رہبر معظم انقلاب نے اپنے خطاب میں واضح کیا کہ ایران کو جوہری ہتھیاروں کی کوئی ضرورت نہیں، لیکن یورینیم افزودگی کے حق سے کبھی پیچھے نہیں ہٹیں گے۔

رہبر معظم انقلاب نے اپنے خطاب میں مزید کہا کہ یورینیم کی افزودگی صرف دفاعی نہیں بلکہ زراعت، ماحولیات، بجلی، طب، صنعت اور دیگر شعبوں میں بھی اہم کردار ادا کرتی ہے۔ انہوں نے عوام کو یاد دلایا کہ پچھلے دس برسوں میں امریکہ ہمیشہ وعدہ خلافی کرتا آیا ہے، اس لیے اس کے ساتھ کسی بھی نئے مذاکرات کا کوئی فائدہ نہیں۔