ٹرمپ کا یمن میں انصاراللہ کے خلاف حملے کی درخواست پر ردعمل

سچ خبریں: رائٹرز نے چار ذرائع کے حوالے سے رپورٹ کیا ہے کہ امریکی صدر ڈونلڈ ٹرمپ نے گزشتہ روز عدن میں قائم صدارتی کونسل کے سربراہ رشاد العلیمی کے ساتھ ٹیلیفونک گفتگو میں انصاراللہ کی افواج کی باب المندب آبنائے کے قریب پیش قدمی کے حوالے سے کفتکو کی۔

اس رپورٹ کے مطابق، العلیمی نے سعودی عرب کے ولی عہد محمد بن سلمان کی طرح ٹرمپ سے مطالبہ کیا کہ وہ انصاراللہ کی افواج کی پیش قدمی کے مقابلے کے لیے کارروائی کریں، تاہم ٹرمپ نے فوجی مدد فراہم کرنے کے حوالے سے کوئی براہ راست وعدہ نہیں کیا۔

گزشتہ روز امریکی وزیر جنگ نے یمن میں عدم مداخلت اور انصاراللہ کی افواج پر حملے نہ کرنے کی وجہ سے متعلق ایک سوال کے جواب میں کہا تھا کہ امریکہ عراق اور افغانستان میں اپنے اقدامات کا اعادہ نہیں کرے گا اور وہ ایران اور چین جیسے اپنے بنیادی مفادات پر توجہ مرکوز کرنے کو ترجیح دیتا ہے۔

اس سے قبل نیویارک ٹائمز نے رپورٹ کیا تھا کہ سعودی عرب اور یمن کی انصاراللہ افواج کے درمیان لڑائی گزشتہ چند روز کے دوران نمایاں طور پر شدت اختیار کر گئی ہے اور یہ افواج سعودی عرب کی سرحدوں کے قریب پہنچ رہی ہیں، جس سے دونوں فریقوں کے درمیان براہ راست زمینی جھڑپوں کا خطرہ بڑھ گیا ہے۔

اس رپورٹ کے مطابق، انصاراللہ کی افواج ریاض سے وابستہ عناصر کے ساتھ شدید جھڑپوں کے سائے میں سعودی عرب کے شہر نجران کی طرف پیش قدمی کرنے میں کامیاب ہو گئی ہیں۔

نیویارک ٹائمز نے مزید بتایا کہ امریکی صدر ہفتوں تک یمن کے ساتھ جنگ میں مدد کے لیے سعودی عرب کی درخواستوں کے بارے میں متردد رہے، تاہم جمعرات کے روز یہ معاملہ اپنے عروج پر پہنچ گیا۔ امریکی حکومت کے حکام نے بتایا کہ سعودی عرب کے ولی عہد محمد بن سلمان نے ٹرمپ سے رابطہ کیا اور ایک بار پھر ان سے مطالبہ کیا کہ وہ اس گروپ کو قابو کرنے کے لیے کارروائی کریں جو تیزی سے پیش قدمی کر رہا ہے۔

ٹرمپ نے اس سے صرف ایک روز قبل اپنے مشیروں سے ملاقات کی تھی اور انہیں بتایا تھا کہ وہ حملوں سے متفق نہیں ہیں۔ تاہم سعودی عرب کے ولی عہد کے ساتھ گفتگو کے بعد انہوں نے اپنی رائے تبدیل کی اور پینٹاگون کو یمن کے خلاف فضائی حملوں کی تیاری کا حکم دیا۔

تاہم اتوار کے روز دوپہر تک امریکی صدر نے ایک بار پھر بظاہر اپنا موقف تبدیل کر لیا۔ امریکی حکومت کے حکام کے مطابق، کم از کم اس وقت، یمن کے خلاف امریکہ کا کوئی فضائی حملہ نہیں ہوگا۔