ٹرمپ کا دعویٰ میکرون کو ادویات کی قیمتیں بڑھانے پر راضی کر لیا

ٹرمپ کا دعویٰ میکرون کو ادویات کی قیمتیں بڑھانے پر راضی کر لیا

خبر رساں ادارے اے ایف پی کے مطابق امریکی صدر ڈونلڈ ٹرمپ نے ایک حالیہ انٹرویو میں دعویٰ کیا ہے کہ انہوں نے فرانس کے صدر ایمانوئل میکرون کو ادویات کی قیمتیں بڑھانے پر آمادہ کر لیا ہے۔ یہ بیان ایسے وقت میں سامنے آیا ہے جب واشنگٹن امریکا میں علاج اور ادویات کے اخراجات کم کرنے کی کوشش کر رہا ہے۔

ڈونلڈ ٹرمپ نے کہا کہ انہوں نے فرانسیسی صدر سے گفتگو کے دوران واضح طور پر مطالبہ کیا کہ یورپ میں ادویات کی قیمتیں بڑھائی جائیں۔ ان کے بقول میکرون نے ابتدا میں اس مطالبے کی مخالفت کی اور کہا کہ وہ ایسا نہیں کریں گے لیکن ٹرمپ نے اصرار جاری رکھا۔

امریکی صدر کے مطابق جب میکرون نے مسلسل انکار کیا تو انہوں نے دھمکی دی کہ اگر فرانس نے ادویات کی قیمتوں میں اضافہ نہ کیا تو امریکا فرانس سے درآمد ہونے والی تمام اشیا پر پچیس فیصد ٹیرف عائد کر دے گا۔ ٹرمپ کا دعویٰ ہے کہ اس کے بعد میکرون نے مؤقف نرم کیا اور بات مان لی۔

ٹرمپ نے ایک بار پھر کہا کہ یورپ میں ادویات کی قیمتیں کم ہونے کی وجہ سے امریکی عوام کو زیادہ قیمت ادا کرنا پڑتی ہے اور اگر یورپی ممالک قیمتیں بڑھائیں تو امریکا میں دواؤں کے اخراجات کم ہو سکتے ہیں۔

رپورٹ میں بتایا گیا ہے کہ رواں سال کے دوران امریکا اور یورپی یونین کے درمیان ایک تجارتی معاہدہ بھی طے پایا تھا جس کے تحت بیشتر یورپی مصنوعات پر پندرہ فیصد درآمدی ٹیرف عائد کیا گیا۔

تاحال فرانسیسی صدارتی محل الیزے کی جانب سے ٹرمپ کے ان دعوؤں پر کوئی باضابطہ ردعمل سامنے نہیں آیا۔