وینزویلا پر حملے میں 150 سے زائد طیاروں نے حصہ لیا:امریکہ

?️ 4 جنوری 2026

وینزویلا پر حملے میں 150 سے زائد طیاروں نے حصہ لیا:امریکہ

امریکی فوج کے چیئرمین جوائنٹ چیفس آف اسٹاف اور صدر کے سینئر عسکری مشیر جنرل ڈین کین نے انکشاف کیا ہے کہ وینزویلا پر اچانک اور رات کے وقت کیے گئے امریکی حملے میں 150 سے زائد فوجی طیاروں نے حصہ لیا، جو 20 مختلف فوجی اڈوں سے روانہ ہوئے تھے۔ اس کارروائی کے نتیجے میں وینزویلا کے صدر نکولس مادورو اور ان کی اہلیہ کو گرفتار کر لیا گیا۔

جنرل کین نے ہفتے کے روز فلوریڈا کے علاقے مارالاگو میں صدر ڈونلڈ ٹرمپ کے ہمراہ پریس کانفرنس کرتے ہوئے بتایا کہ اس کارروائی کو “آپریشن عزمِ مطلق” کا نام دیا گیا تھا، جو نہایت خفیہ اور انتہائی درست منصوبہ بندی کے تحت انجام دی گئی۔

انہوں نے کہا کہ اس آپریشن میں امریکی بری فوج، بحریہ، فضائیہ، میرین کور، انٹیلی جنس اداروں اور قانون نافذ کرنے والے اداروں کے تمام شعبوں نے مکمل ہم آہنگی کے ساتھ حصہ لیا۔

جنرل کین کے مطابق، حملے میں ایف-35، ایف-22، ایف-18 جنگی طیارے، بی-1 بمبار طیارے اور بڑی تعداد میں بغیر پائلٹ ڈرونز استعمال کیے گئے۔ ان طیاروں کا بنیادی مقصد ہیلی کاپٹروں کو فضائی تحفظ فراہم کرنا تھا، جو مادورو اور ان کی اہلیہ کو گرفتار کرنے کے لیے تعینات تھے۔

انہوں نے بتایا کہ آپریشن کے دوران ایک امریکی طیارہ نشانہ بنا، تاہم وہ پرواز کے قابل رہا اور تمام امریکی طیارے بحفاظت اپنے اڈوں پر واپس لوٹ آئے۔

امریکی فوج کے سربراہ نے دعویٰ کیا کہ وینزویلا کے فضائی دفاعی نظام کو ناکارہ بنانے کے بعد امریکی فورسز نے مکمل حیرت کے عنصر کے ساتھ کارروائی کی۔ امریکی فوجی مقامی وقت کے مطابق رات 1 بج کر 1 منٹ پر مادورو کی رہائش گاہ پہنچے اور علاقے کا مکمل کنٹرول سنبھال لیا۔

انہوں نے کہا کہ ہیلی کاپٹروں پر فائرنگ کی گئی، جس کے جواب میں امریکی فورسز نے طاقت کا استعمال کیا، تاہم تمام ہیلی کاپٹر بحفاظت واپس لوٹ آئے۔ جنرل کین کے مطابق، مادورو اور ان کی اہلیہ نے گرفتاری سے قبل ہتھیار ڈال دیے تھے اور بعد ازاں انہیں امریکی وزارتِ انصاف کے حوالے کر دیا گیا۔

انہوں نے مزید بتایا کہ مادورو اور ان کی اہلیہ کو امریکی بحری جہاز یو ایس ایس ایوو جیما پر سوار کر کے نیویارک منتقل کیا گیا۔

جنرل کین نے اعتراف کیا کہ اس حملے کے لیے مہینوں پر محیط انٹیلی جنس کارروائی کی گئی، جس میں مادورو کی رہائش، روزمرہ معمولات حتیٰ کہ ان کی خوراک تک کے بارے میں معلومات حاصل کی گئیں۔

انہوں نے کہا کہ امریکی انٹیلی جنس ٹیموں نے زمینی فورسز کو لمحہ بہ لمحہ معلومات فراہم کیں تاکہ کارروائی کم سے کم خطرے کے ساتھ مکمل کی جا سکے۔

امریکی صدر ڈونلڈ ٹرمپ نے اس سے قبل تصدیق کی تھی کہ وینزویلا پر بڑا اور کامیاب حملہ کیا گیا ہے اور اعلان کیا تھا کہ امریکہ وینزویلا میں نظام کی تبدیلی تک پیچھے نہیں ہٹے گا۔