وائٹ ہاوس میں ٹرمپ اور اردوان کی ملاقات دونوں ملک نئی راہ پر گامزن 

امریکی صدر ڈونلڈ ٹرمپ اور ترک صدر رجب طیب اردوان  کی وائٹ ہاؤس میں ملاقات کو ماہرین ایک مثبت پیش رفت قرار دے رہے ہیں، جس سے دونوں ممالک کے تعلقات میں نیا باب کھلنے کی توقع ہے۔ یہ ملاقات چھ سال بعد ہوئی ہے، کیونکہ سابق صدر جو بائیڈن کے دور میں واشنگٹن اور انقرہ کے تعلقات تناؤ کا شکار رہے تھے۔

اس ملاقات میں خطے کے بڑے مسائل، جیسے روس-یوکرین جنگ، شام میں تبدیلی اقتدار اور دو سالہ غزہ جنگ پر گفتگو ہوئی۔ دونوں رہنماؤں نے شام میں نئے قیادت کو موقع دینے پر اتفاق کیا۔ ٹرمپ نے اردوان کو طاقتور اور باوقار رہنما قرار دیتے ہوئے ان کے کردار کو سراہا۔

ملاقات کے دوران توانائی کے شعبے میں تعاون کے لیے ایک اہم معاہدہ ہوا جس کے تحت ترکی میں بجلی پیدا کرنے کے لیے ایٹمی ری ایکٹر بنایا جائے گا۔ اس کے علاوہ اطلاعات کے مطابق انقرہ نے اربوں ڈالر مالیت کے بوئنگ طیارے خریدنے میں دلچسپی ظاہر کی ہے۔ تاہم دفاعی معاہدوں پر کھل کر بات نہیں کی گئی۔

ایف-16 جنگی طیاروں کی خریداری بھی مذاکرات کا حصہ رہی، لیکن اس پر شرائط عائد کیے جانے کا امکان ہے، خاص طور پر ترکی کی روسی گیس پر انحصار کم کرنے کے حوالے سے۔ دوسری طرف ایف-35 منصوبے میں ترکی کی شمولیت کو کئی رکاوٹوں کا سامنا ہے، جن میں امریکی کانگریس، یونانی و اسرائیلی لابیاں اور روسی ایس-400 دفاعی نظام شامل ہیں۔

ماہرین کے مطابق یہ ملاقات دونوں ملکوں کے درمیان اعتماد سازی کا آغاز ہے۔ اگرچہ اختلافات موجود ہیں، خاص طور پر روس اور غزہ کے معاملات پر، لیکن دونوں فریقین نے مشترکہ مفادات، بالخصوص اقتصادی اور تجارتی شعبے میں، تعلقات کو آگے بڑھانے پر زور دیا۔

ٹرمپ اور اردوان نے کمیٹیوں کی تشکیل پر بھی اتفاق کیا ہے تاکہ مستقبل میں طے پانے والے معاہدوں کی پیشرفت کا جائزہ لیا جا سکے۔ تجزیہ کاروں کے مطابق یہ نیا راستہ تب ہی کامیاب ہوگا جب امریکی ادارے اور کانگریس بھی اس کا ساتھ دیں۔