نیتن یاہو صرف وقت خریدنا چاہتا ہے،کسی بھی معاہدے کی راہ میں رکاوٹ بن رہا ہے

نیتن یاہو صرف خریدنا چاہتا ہیں،کسی بھی معاہدے کی راہ میں رکاوٹ بن رہا ہے

فلسطینی تحریک حماس کے رہنما محمود مرداوی نے الزام عائد کیا ہے کہ اسرائیلی وزیراعظم بنیامین نتن یاہو جان بوجھ کر جنگ کو طویل کرنے کی کوشش کر رہے ہیں اور فریقین کے درمیان ممکنہ جنگ بندی اور قیدیوں کے تبادلے کے معاہدے میں سب سے بڑی رکاوٹ بنے ہوئے ہیں۔

العربیہ کو دیے گئے ایک انٹرویو میں مرداوی نے کہا کہ حماس نے ثالثی کرنے والے ممالک کی پیشکشیں قبول کر لی ہیں اور وہ ایک جامع معاہدے پر تیار ہے، مگر نتن یاہو نے نہ صرف اس پر مثبت جواب نہیں دیا بلکہ اپنی سیاسی مقاصد کے لیے وقت ضائع کرنے اور متضاد بیانات دینے کی پالیسی اپنائی ہے۔

ان کا کہنا تھا کہ اسرائیلی وزیراعظم بار بار مذاکراتی عمل کو سبوتاژ کر چکے ہیں اور خود امریکی وزارتِ خارجہ بھی اس بات کا اعتراف کر چکی ہے کہ نتن یاہو ہی کسی بھی پیش رفت کی راہ میں رکاوٹ ہیں۔

مرداوی نے مزید کہا کہ حماس کسی ایسے فارمولے کی مخالف نہیں جو جنگ بندی، قیدیوں کی رہائی، غزہ میں امدادی سامان کی فراہمی اور فلسطینی قیادت کے تحت تعمیرِ نو کو یقینی بنائے۔ تاہم اسرائیلی حکام جان بوجھ کر امدادی قافلوں کی راہ میں رکاوٹ بنتے ہیں اور مقامی انفرا اسٹرکچر کو نشانہ بنا کر انسانی بحران کو گہرا کر رہے ہیں۔

حماس رہنما کے مطابق، اقوامِ متحدہ کی رپورٹ میں بھی غزہ میں قحط کے آغاز کی تصدیق ہو چکی ہے جو اس بات کا ثبوت ہے کہ اسرائیل فلسطینی عوام کو بھوکا رکھنے کی منظم پالیسی پر عمل پیرا ہے۔

انہوں نے عالمی برادری پر زور دیا کہ وہ محض بیانات تک محدود نہ رہے بلکہ اسرائیلی جرائم کے خلاف عملی اقدامات کرے اور امریکہ پر دباؤ ڈالے کہ وہ نتن یاہو کی جنگی پالیسیوں کی حمایت ختم کرے۔

مرداوی نے کہا کہ فلسطینی مزاحمت ہر قیمت پر اپنے عوام کے حقوق اور عزت کا دفاع کرے گی اور جنگ بندی کے لیے تیار ہے، مگر اصل رکاوٹ نتن یاہو ہیں جو ذاتی سیاسی مفادات کے لیے خونریزی کو طول دے رہے ہیں۔