مغربی کنارے پر صہیونی فوج کا دھاوا، آنسو گیس کی شیلنگ

?️ 7 جنوری 2026

مغربی کنارے پر صہیونی فوج کا دھاوا، آنسو گیس کی شیلنگ

ذرائع ابلاغ کے مطابق اسرائیلی قابض افواج نے دریائے اردن کے مغربی کنارے میں بڑے پیمانے پر کارروائیاں کرتے ہوئے فلسطینی شہریوں کی وسیع پیمانے پر گرفتاریاں کیں اور متعدد گھروں کو عارضی فوجی و تفتیشی مراکز میں تبدیل کر دیا۔

القدس نیٹ ورک کے حوالے سے بتایا گیا ہے کہ اسرائیلی افواج نے منگل کی شب اور بدھ کی صبح سویرے مغربی کنارے کے مختلف علاقوں پر چھاپے مارے، جن کے دوران فلسطینیوں کو گرفتار کیا گیا اور گھروں میں میدانی تفتیش کی گئی۔

اس سلسلے میں جنین کے مغرب میں واقع گاؤں السیلة الحارثیہ شدید فوجی یلغار کا شکار رہا، جہاں اسرائیلی فوج نے گھروں پر فائرنگ کی۔ قابض افواج نے گاؤں کے متعدد مکانات کو فوجی مراکز میں تبدیل کر کے بڑی تعداد میں فلسطینیوں کو وہاں منتقل کیا۔

مقامی ذرائع نے بتایا کہ اسرائیلی فوج نے جنین کے جنوب میں واقع گاؤں سیریس پر بھی دھاوا بولا، جبکہ میثلون گاؤں پر حملے کے دوران صوتی بموں کا استعمال کیا گیا۔

جنین کے جنوب مشرق میں واقع رابا گاؤں میں آج صبح یہودی آبادکاروں نے ایک کھیت کے اطراف حملہ کیا اور فلسطینی شہریوں کو اشتعال دلانے کی کوشش کی۔

اسی دوران نابلس کے جنوب میں واقع مادما گاؤں میں قابض افواج نے قاسم شریف نصار نامی نوجوان کے گھر پر دھاوا بولا، سامان کی توڑ پھوڑ کی اور اسے گرفتار کر کے اپنے ساتھ لے گئے۔

طولکرم کے شمال میں دیر الغصون گاؤں اور شویکہ محلے، الخلیل کے شمال میں العروب کیمپ اور حلحول گاؤں میں بھی اسرائیلی فوج نے آنسو گیس اور صوتی بموں کی شیلنگ کی اور متعدد فلسطینیوں کو حراست میں لیا۔

الخلیل کے جنوب میں الظاہریہ بستی میں اسرائیلی فوج اور فلسطینی نوجوانوں کے درمیان جھڑپیں بھی ہوئیں۔

رام اللہ کے مغرب میں الجانیہ گاؤں، الطیرہ محلہ اور الجلزون پناہ گزین کیمپ پر بھی فوجی یورش کی گئی۔ اسی طرح بیت لحم کے علاقے ارطاس اور مغربی سفلیت کے قصبہ بلدیا میں بھی چھاپے مارے گئے۔اریحا کے علاقے عقبہ جبر پناہ گزین کیمپ میں اسرائیلی فوج نے کم از کم تین فلسطینی نوجوانوں کو گرفتار کیا۔