مغربی عراق میں داعش کے 4 ٹھکانے تباہ

مغربی عراق میں داعش کے 4 ٹھکانے تباہ

عراق کے صوبہ الانبار میں سیکیورٹی فورسز نے کارروائی کرتے ہوئے دہشت گرد تنظیم داعش کے چار خفیہ ٹھکانے تباہ کر دیے۔

عراقی سیکیورٹی ذرائع کے مطابق،الحشد الشعبی نے مشرقی الانبار کے شہر الکرمہ اور اس کے نواحی علاقوں میں وسیع پیمانے پر آپریشن کیا۔ اس کارروائی کا مقصد علاقے میں سیکیورٹی صورتِ حال کا جائزہ لینا، استحکام کو مضبوط بنانا اور ممکنہ خطرات کو روکنا تھا۔

ذرائع نے بتایا کہ صحرائی علاقوں میں قائم داعش کے چار خفیہ ٹھکانوں کو نشانہ بنایا گیا۔ ان میں سے ایک مقام پر بارودی مواد نصب تھا جسے فورسز نے محفوظ فاصلے سے دھماکے کے ذریعے ناکارہ بنا دیا۔

اطلاعات کے مطابق یہ آپریشن خفیہ معلومات ملنے کے بعد کیا گیا، جن میں بتایا گیا تھا کہ دشوار گزار صحرائی علاقوں میں داعش کے عناصر سرنگوں اور پناہ گاہوں میں چھپے ہوئے ہیں۔

واضح رہے کہ عراقی فورسز بالخصوص صوبہ الانبار اور مغربی علاقوں میں داعش کے باقی ماندہ عناصر کے خلاف وقتاً فوقتاً کارروائیاں کرتی رہتی ہیں تاکہ امن و امان کو یقینی بنایا جا سکے۔