مصر صیہونی حکومت کے ساتھ امن معاہدے میں تبدیلی کا خواہاں

سچ خبریں: نیشنل نیوز ویب سائٹ نے امریکی ذرائع کے حوالے سے بتایا ہے کہ صدر مصر عبدالفتاح السیسی اس ماہ امریکی صدر ڈونلڈ ٹرمپ سے ملاقات کریں گے۔ ذرائع کے مطابق، یہ السیسی کا صدر ٹرمپ کی دوسری مدت میں واشنگٹن کا پہلا دورہ ہوگا۔

رپورٹ میں کہا گیا ہے کہ السیسی اور ٹرمپ خطے کے اہم معاملات پر تبادلہ خیال کریں گے، خاص طور پر غزہ جنگ کے بعد قاہرہ اور تل ابیب کے تعلقات، اور دریائے نیل پر ایتھوپیا کے زیر تعمیر ڈیم سد النہضہ پر۔

میٹنگ کی تاریخ کا تو ابھی تک اعلان نہیں کیا گیا ہے، لیکن رپورٹس میں بتایا گیا ہے کہ السیسی 1979ء میں اسرائیل کے ساتھ ہونے والے امن معاہدے میں اصلاحات پر بات چیت کرنا چاہتے ہیں۔ ذرائع کے مطابق، قاہرہ سب سے پہلے سینا ریگستان کے "زون سی” میں تعینات فوجیوں کی تعداد اور ان کے ہتھیاروں پر عائد پابندیاں کم کرنا چاہتا ہے۔

موجودہ معاہدے کے تحت، مصر کو اس علاقے میں محدود تعداد میں سرحدی دستوں اور مخصوص ہتھیاروں کی تعیناتی کی اجازت ہے۔ تاہم، اسرائیل کی غزہ اور سینا کے درمیان سرحدی علاقے میں فوجی موجودگی کے بعد، قاہرہ نے اس خطے میں اپنی فوجی موجودگی بڑھانے کی کوششیں تیز کر دی ہیں۔