فرانس کی وزارت داخلہ پر سائبر حملہ، خفیہ فائلیں اور لاکھوں حساس ڈیٹا چوری

?️ 17 دسمبر 2025

فرانس کی وزارت داخلہ پر سائبر حملہ، خفیہ فائلیں اور لاکھوں حساس ڈیٹا چوری

فرانس کی وزارت داخلہ کو ایک بڑے سائبر حملے کا سامنا کرنا پڑا ہے، جس کے نتیجے میں درجنوں خفیہ فائلیں اور لاکھوں حساس ڈیٹا چوری ہونے کی تصدیق کی گئی ہے۔ فرانسیسی وزیر داخلہ لوران نونز نے بدھ کے روز اس حملے کی تصدیق کرتے ہوئے کہا کہ یہ واقعہ وزارت کے لیے ایک سنجیدہ دھچکا ثابت ہوا ہے۔

فرانسیسی اخبار لو فیگارو کے مطابق وزیر داخلہ نے بتایا کہ مجرمانہ ریکارڈ کے ڈیٹا بیس اور مطلوب افراد کی فہرست سے متعلق نظام ان فائلوں میں شامل ہیں جن تک سائبر حملہ آوروں نے غیر قانونی رسائی حاصل کی۔

انہوں نے ایک ریڈیو انٹرویو میں کہا کہ اس مرحلے پر یہ واضح نہیں ہو سکا کہ مکمل طور پر کون سا ڈیٹا چرایا گیا ہے، تاہم امکان ہے کہ درجنوں فائلیں حذف یا چرا لی گئی ہوں اور بات لاکھوں معلوماتی اندراجات تک جا پہنچتی ہے۔

لوران نونز کے مطابق یہ حملہ ایک فرد یا کسی منظم گروہ کی جانب سے کیا گیا، جنہوں نے وزارت داخلہ کے ای میل اکاؤنٹس کے ذریعے انفارمیشن سسٹمز تک رسائی حاصل کی اور پاس ورڈز بازیاب کر کے ڈیٹا تک پہنچے۔ انہوں نے اعتراف کیا کہ اس معاملے میں وزارت کی جانب سے غفلت بھی سامنے آئی ہے۔

وزیر داخلہ نے بتایا کہ یہ سائبر حملہ گزشتہ ہفتے کے آخر میں شروع ہوا اور کئی دنوں تک جاری رہا۔ حکام اب اس حملے کے دائرہ کار اور نقصانات کا مکمل اندازہ لگانے میں مصروف ہیں، جبکہ سکیورٹی نظام کو مزید مضبوط بنانے کے اقدامات بھی کیے جا رہے ہیں۔