غزہ کے باسیوں کو یا گولی سے ماریں گے یا بھوک سے:اسرائیلی وزیر خزانہ

غزہ کے باسیوں کو یا گولی سے ماریں گے یا بھوک سے:اسرائیلی وزیر خزانہ

اسرائیل کے وزیر خزانہ بزالل اسموتریچ نے ایک بار پھر غزہ کے عوام کے خلاف انتہائی تند و تیز اور جنایتکارانہ بیانات دیتے ہوئے کہا ہے کہ غزہ کے شہریوں کو یا تو گولیوں سے قتل کیا جائے گا یا پھر بھوک سے مرنے پر مجبور کیا جائے گا۔

قطر کے نشریاتی ادارے الجزیرہ کے مطابق اسموتریچ نے جمعرات کو اپنے بیان میں دعویٰ کیا کہ تل ابیب کا مقصد حماس کے فوجی ڈھانچے کو مکمل طور پر ختم کرنا ہے اور جب تک حماس دوبارہ منظم ہونے کی صلاحیت رکھتی ہے، کسی قسم کا معاہدہ قبول نہیں کیا جانا چاہیے۔

انہوں نے کہا کہ غزہ کے آبادیاتی مسئلے کا واحد حل یہ ہے کہ وہاں کے لوگ رضاکارانہ طور پر نقل مکانی کریں۔ ان کے بقول، غزہ میں پانی، بجلی اور خوراک بند کر دی جانی چاہیے تاکہ جو لوگ گولیوں سے نہ مریں وہ بھوک سے ہلاک ہو جائیں۔

اسموتریچ نے مزید کہا کہ اسرائیلی کابینہ کو غزہ پر حتمی فیصلہ لینا ہوگا اور فوج اسے عملی جامہ پہنائے گی۔ اس نے یہ بھی دعویٰ کیا کہ ہم ہر ہفتے غزہ کے کچھ حصے اسرائیل میں ضم کریں گے اور ایک ماہ کے اندر زیادہ تر علاقے اسرائیلی کنٹرول میں آ جائیں گے۔

انہوں نے وزیر اعظم بنیامین نیتن یاہو پر زور دیا کہ وہ غزہ کے باسیوں کی جبری ہجرت اور زمینوں کے الحاق کی پالیسی کو ترجیح دیں۔

یاد رہے کہ اسرائیلی وزیر کے یہ بیانات اس وقت سامنے آئے ہیں جب عالمی برادری مسلسل اسرائیل کے جنگی جرائم اور بین الاقوامی قوانین کی خلاف ورزیوں کی مذمت کر رہی ہے۔