غزہ میں صحافیوں کی خطرناک صورتحال،صہیونی میڈیا سے خوفزدہ ہیں 

?️ 25 اگست 2025

غزہ میں صحافیوں کی خطرناک صورتحال،صہیونی میڈیا سے خوفزدہ ہیں

فلسطینی میڈیا ایسوسی ایشن کے سربراہ محمد یاسین نے کہا ہے کہ غزہ میں صحافی انتہائی دشوار اور غیرانسانی حالات میں اپنی ذمہ داریاں انجام دے رہے ہیں جبکہ اسرائیلی افواج انہیں منظم انداز میں نشانہ بنا رہی ہیں تاکہ سچائی کی آواز دبائی جا سکے اور غزہ پر ڈھائے جانے والے مظالم دنیا تک نہ پہنچ سکیں۔

محمد یاسین کے مطابق قابض فورسز بخوبی جانتی ہیں کہ صحافی اصل گواہ اور مظلوم عوام کی آواز ہیں، اسی لیے انہیں قتل، زخمی اور منظر سے غائب کرنے کی پالیسی اپنائی جا رہی ہے تاکہ اسرائیل اپنی جھوٹی داستانیں عالمی برادری کو پیش کر سکے۔

انہوں نے بتایا کہ غزہ کے صحافیوں کے پاس بجلی اور انٹرنیٹ جیسی بنیادی سہولیات بھی نہیں ہیں، درجنوں صحافی شہید یا زخمی ہو چکے ہیں، ان کے گھر تباہ کر دیے گئے اور ان کے اہل خانہ بھی شہادت کا نشانہ بنے ہیں۔

یاسین نے مزید کہا کہ اسرائیلی حکومت جان بوجھ کر غیرملکی صحافیوں کو غزہ میں داخل ہونے سے روک رہی ہے تاکہ میڈیا بلیک آؤٹ قائم رکھا جا سکے اور ان کے جرائم دنیا کے سامنے نہ آئیں۔ ان کے بقول آزاد بین الاقوامی صحافیوں کی موجودگی قابض افواج کے مظالم کو بے نقاب کر سکتی ہے اور یہی چیز اسرائیل کو سب سے زیادہ خوفزدہ کرتی ہے۔

انہوں نے عالمی برادری اور انسانی حقوق کی تنظیموں سے اپیل کی کہ وہ اپنی ذمہ داری ادا کریں، اسرائیل پر دباؤ ڈالیں تاکہ صحافیوں پر حملے بند کیے جائیں اور غیرملکی میڈیا کو فوری طور پر غزہ جانے کی اجازت دی جائے۔