صیہونی وزیر کا بستیوں کی تعمیر کے بارے میں اظہار خیال

?️ 10 جولائی 2021

سچ خبریں:صہیونی حکومت کے وزیر برائے داخلی امور نے ایک متنازعہ بیان میں کہا ہے کہ صیہونی بستیوں کی تعمیر کو کسی بھی حالت میں نہیں روکا جائے گا۔
العہد نیوز ایجنسی کی رپورٹ کے مطابق اسرائیلی وزیر داخلہ ایلیٹ شکیڈ نے مقبوضہ فلسطینی علاقوں میں صیہونی حکومت کی آباد کاریوں کے حوالے سے ایک متنازعہ بیان دیا، رپورٹ کے مطابق صہیونی وزیر نے اس بات پر زور دیا کہ مقبوضہ بیت المقدس اور مغربی کنارے میں صیہونی بستیوں کی تعمیر کبھی نہیں رکے گی۔

شکیڈ نے کہاکہ نئی صیہونی کابینہ بستیوں کی تعمیر میں کوئی تبدیلی نہیں کرے گی، یہاں تک کہ اگر امریکہ بھی یہی چاہے تب بھی ایسا نہیں ہوگا،یادرہے کہ صہیونی وزیر کے معاندانہ ریمارکس اس وقت سامنے آئے ہیں جب مغربی کنارے اورمقبوضہ بیت المقدس میں صیہونی بستیوں کی تعمیر اقوام متحدہ کی سلامتی کونسل کے قوانین اور قراردادوں کی خلاف ورزی ہے، تاہم ان بستیوں کی غیر قانونی تعمیر پر عالمی برادری خاموش ہے۔

واضح رہے کہ اس سے قبل اعلان کیا گیا تھا کہ نفتالی بینیٹ کی سربراہی میں صیہونی حکومت کی نئی کابینہ مقبوضہ علاقوں میں بستیوں کی تعمیر کے کام میں تیزی لانےکا ارادہ رکھتی ہے، اس مقصد کے لئے صیہونی حکومت کی کابینہ نے بستیوں کی تعمیر کو تیز کرنے کے سلسلے میں ایک نیا راستہ اختیار کیا ہے۔

قابل ذکر ہے کہ بینیٹ کی کابینہ نے اسرائیلی آباد کاروں سے وعدہ کیا ہے کہ انہیں ہر تین ماہ بعد بستیوں کی تعمیر کے لئے ایک نیا اجازت نامہ دیا جائے گانیز مغربی کنارے اور مقبوضہ بیت المقدس میں غیر قانونی تعمیرات کے لئے اجازت نامے جاری کیے جائیں گے،اس سلسلے میں ایک صہیونی عہدیدار نے کہاکہ کابینہ کے ارکان نے تعمیراتی اجازت نامے دینے پر اتفاق کیا ہے۔

قابل ذکر ہے کہ 3 جولائی کو جب سے نفتالی بینیٹ اقتدار میں آئے ہیں، مقبوضہ علاقوں میں صیہونی بستیوں میں اور بھی وسعت آچکی ہے۔