صہیونی وزیر کا متحدہ عرب امارات کا خفیہ دورہ

?️ 24 جنوری 2023

سچ خبریں:عبرانی ویب سائٹ واللا نے دو باخبر ذرائع کے حوالے سے ایک صہیونی وزیر کے متحدہ عرب امارات کے خفیہ دورے اور اس ملک کے حکام سے ملاقات کے بارے میں بتایا ہے۔

اس رپورٹ کے مطابق مذکورہ بالا عبرانی ویب سائٹ نے ان ذرائع کے حوالے سے بتایا ہے کہ صیہونی حکومت کے اسٹریٹیجک امور کے وزیر رون ڈرمر نے خفیہ طور پر متحدہ عرب امارات کا سفر کیا اور متحدہ عرب امارات کے حکام سے ملاقات کی۔

ان دو ذرائع میں سے ایک نے کہا ہے کہ صیہونی حکومت کے قومی سلامتی کے مشیر تساہی ہنگبی اس سفر میں ڈرمر کے ساتھ تھے۔

اس رپورٹ میں کہا گیا ہے کہ ڈرمر کے دورہ ابوظہبی کا ایک مقصد صیہونی حکومت کے وزیر اعظم بنجمن نیتن یاہو کے دورہ متحدہ عرب امارات کی تیاری کرنا تھا۔
نیتن یاہو نے کہا ہے کہ بطور وزیر اعظم ان کا پہلا غیر ملکی دورہ ابوظہبی کا ہو گا اور انہوں نے یہ دورہ دو ہفتے قبل کرنے کا منصوبہ بنایا تھا تاہم یہ دورہ ملتوی کر دیا گیا تھا۔
اس رپورٹ میں مزید کہا گیا ہے کہ مسجد الاقصی پر صہیونی وزیر اٹمر بن گویر کا حملہ اس سفر کو ملتوی کرنے کا سبب بنا اور خطے میں کشیدگی کی وجہ سے سفر کے لیے نئے وقت کا تعین کرنے کے لیے رابطہ کاری میں اضافہ ہوا ہے۔

ڈرمر صیہونی حکومت کے وزیر اعظم بنجمن نیتن یاہو کے قریب ترین وزیروں میں سے ایک ہیں جو امریکہ کے ساتھ تعلقات، ایران کے مسئلے اور سمجھوتے کے معاہدوں کے فروغ اور عرب ممالک کے ساتھ تعلقات کو معمول پر لانے کے ذمہ دار ہیں۔